Elde alǵashqy Montessorı ǵylymı-zertteý zerthanasy ashylady
ASTANA. KAZINFORM — Abaı ýnıversıteti men Perýdjadaǵy (Italııa) tuńǵysh Halyqaralyq Marııa Montessorı ortalyǵy ózara yntymaqtastyq týraly negizdemelik kelisimge qol qoıdy.
Taraptar Qazaqstanda alǵashqy Montessorı ǵylymı-zertteý zerthanasyn jáne Abaı ýnıversıteti bazasynda pedagogtardy sertıfıkattaýdyń ulttyq ortalyǵyn qurýǵa ýaǵdalasty.
Bul mańyzdy seriktestik elimizdegi ınklıýzıvti bilim berýdi damytýǵa jáne jańa býyn muǵalimderin daıarlaýǵa ozyq álemdik tájirıbelerdi júıeli túrde engizýge baǵyttalǵan. 100 jyldyq mereıtoıy qarsańynda Abaı ýnıversıteti zertteý baǵytyndaǵy jańa úlgidegi pedagogıkalyq joǵary oqý ornyna transformatsııalanýdyń aýqymdy baǵdarlamasyn júzege asyryp jatyr.
— Mundaǵy basty basymdyqtarynyń biri — halyqaralyq deńgeıde moıyndalǵan ádistemelerdi engizý, óıtkeni Qazaqstanda bul júıege degen qyzyǵýshylyq jyl sanap artyp keledi. Búgingi tańda Montessorı pedagogıkasynyń qaǵıdalary elimizdiń 11 qalasyndaǵy 40-tan astam mektepke deıingi uıymdar men bilim berý ortalyqtarynda qoldanylady, alaıda bul tájirıbeni ári qaraı keńeıtý úshin irgeli akademııalyq baza men bilikti mamandar daıarlaý qajet, — delingen habarlamada.
Italııalyq ortalyqtyń prezıdenti Sımone Pavonı jáne vıtse-prezıdenti Lýchıo Lombardımen ótken kelissóz barysynda birlesken jumystyń negizgi baǵyttary aıqyndaldy. Olardyń qatarynda stýdentterge halyqaralyq AMI sertıfıkattaryn beretin birlesken bilim berý baǵdarlamalaryn ázirleý, «oqytýshylardy oqytý» modeli boıynsha daıyndaý, sondaı-aq balanyń erte damýy, neıropedagogıka, qazirgi zamanaýı bilim berý tehnologııalary men gerontologııa salalarynda ǵylymı zertteýler júrgizý bar. Sonymen qatar Abaı ýnıversıteti egde jastaǵy adamdarmen jumys isteýge baǵyttalǵan Silver Agri Age jáne Silver Agri Care jobalaryna da qyzyǵýshylyq tanytyp otyr.
Abaı ýnıversıtetiniń resmı delegatsııasy ortalyqtyń praktıkalyq ınfraqurylymymen tanysyp, «Lıdııa Chelı» atyndaǵy bóbekjaıdy, balabaqsha men bastaýysh mektepti aralady. Ýnıversıtet rektory Bolat Tilep atalǵan sapardyń maqsaty Italııanyń joǵary oqý oryndarymen uzaq merzimdi akademııalyq seriktestik ornatý ekenin atap ótti. Onyń aıtýynsha, halyqaralyq saraptama men ǵylymı-zertteý salasyndaǵy yntymaqtastyqtyń ózara yqpaldastyǵy ǵalymdar, stýdentter jáne bolashaq urpaq úshin jańa múmkindikterge jol ashady.
Sondaı-aq delegatsııanyń Italııanyń jetekshi joǵary oqý oryndary — Sapienza, UniCamillus jáne LUISS ýnıversıtet ókilderimen birqatar resmı kezdesý ótkizý josparlanǵan.
Aıta ketelik elde jasandy ıntellekt boıynsha halyqaralyq aına zerthanasy qurylatyny týraly jazǵan edik.
