Elimizde alǵash robot kómegimen qashyqtan ota jasaldy
ASTANA. KAZINFORM – Búgin Qazaq onkologııa jáne radıologııa ǵylymı-zertteý ınstıtýtynda (QazORǴZI) Qazaqstanda alǵash ret Sagebot SR–2000 robottandyrylǵan hırýrgııalyq júıesin qoldana otyryp, Beıjiń ýnıversıtetiniń Birinshi aýrýhanasymen birlesip biregeı hırýrgııalyq aralasý júrgizildi. Bul týraly Densaýlyq saqtaý mınıstrliginiń baspasóz qyzmeti habarlady.
— Hırýrgııa shamamen eki saǵatqa sozyldy. Operatsııa barysynda aǵzanyń fýnktsıonaldyq belsendiligin saqtaı otyryp jáne operatsııadan keıingi asqyný qaýpin azaıta otyryp, qaterli isikti alyp tastaýǵa baǵyttalǵan búırektiń aǵzany saqtaıtyn ishinara rezektsııasy oryndaldy, — delingen habarlamada.
Operatsııany doktor Lı Sıýe Sýn (M.D., Rh.D.) Beıjiń qalasynda (QHR) jáne zamanaýı telekommýnıkatsııalyq tehnologııalardy qoldana otyryp, aralasý barysyn qashyqtan basqardy. Almatyda (Qazaqstanda) operatsııanyń barysyn baqylaýdy QazORǴZI hırýrg-dárigeri, PhD Hýsan Talıpbaıuly Ómirzaqov júzege asyrdy.
Robottandyrylǵan hırýrgııa ýrologııa, gınekologııa jáne jalpy hırýrgııa sııaqty salalardaǵy eń zamanaýı jáne tıimdi ádisterdiń biri. Bul ádis laparoskopııanyń artyqshylyqtaryn — az ınvazıvti qoljetimdilikti jáne tinderdiń eń tómen jaraqattanýyn — 3D-beıneleý múmkindikterimen, qozǵalystyń joǵary dáldigimen jáne ıntellektýaldy baqylaý júıelerimen biriktiredi. Bul operatsııadan keıingi kezeńniń jeńil aǵymyn, erte belsendirýdi, emdeýge jatqyzý ýaqytyn qysqartýdy jáne asqyný qaýpin azaıtýdy qamtamasyz etedi.
Medıtsınalyq tehnologııalardy strategııalyq damytý sheńberinde aldaǵy aılarda robottandyrylǵan hırýrgııalyq júıeni paıdalana otyryp, 50 joǵary tehnologııalyq operatsııa júrgizý josparlanyp otyr. Operatsııalar ýrologııa, gınekologııa jáne abdomınaldyq hırýrgııa sııaqty negizgi baǵyttarda jasalady.
Búgingi tańda Qytaı men Túrkııanyń jetekshi onkologııa ortalyqtarymen qoldanystaǵy kelisimderdiń sheńberinde robottandyrylǵan hırýrgııany qoldana otyryp, ártúrli lokalızatsııalardaǵy isik aýrýlaryn emdeýdiń ınnovatsııalyq ádisterin engizý boıynsha birlesken jobalardy iske asyrý josparlanyp otyr.
Aıta ketelik Qazaqstanda múgedektigi bar balalarǵa qandaı jaǵdaı jasalǵany týraly jazǵan edik.