Elde alǵash ret «SHAIQAS-2026» áskerı-ınjenerlik chempıonaty ótip jatyr
ASTANA. KAZINFORM — Jeńimpazdardy qomaqty syıaqy kútip tur. Chempıonattyń jalpy júlde qory 18 mıllıon teńgeni quraıdy, dep habarlaıdy Qorǵanys mınıstrliginiń baspasóz qyzmeti.
Aýqymdy joba ushqyshsyz avıatsııalyq júıelerdi ázirleýshilerdi, jerústi robototehnıkasy mamandaryn, kıberqaýipsizdik salasynyń sarapshylaryn jáne taktıkalyq daıyndyq boıynsha kásibı mamandardy bir alańǵa toǵystyrdy.
Chempıonattyń basty maqsaty — qorǵanys salasyna arnalǵan ozyq ınjenerlik sheshimderdi anyqtap, olardy keıinnen Qazaqstan Qarýly kúshteriniń qajettiligine engizý. Sonymen qatar joba áskerı jáne azamattyq ınjenerlerdiń, ǵalymdar men IT-mamandardyń tájirıbe almasýyna múmkindik beretin mańyzdy alań retinde qarastyrylyp otyr.
Birinshi kezeńge elimizdiń ár óńirinen 150 qatysýshydan quralǵan 19 ınjenerlik komanda tirkeldi. Olardyń qatarynda áskerı oqý oryndarynyń, joǵary oqý oryndarynyń, ınjenerlik mektepterdiń, qorǵanys-ónerkásip kesheni kásiporyndarynyń jáne Qazaqstan Qarýly kúshteri bólimsheleriniń ókilderi bar.
Chempıonattyń saltanatty ashylý rásiminde sóz sóılegen Qazaqstan Respýblıkasy Qorǵanys mınıstriniń orynbasary Darhan Ahmedıev bul bastamanyń elimizdiń qorǵanys áleýetin nyǵaıtýdaǵy mańyzyn erekshe atap ótti.
— SHAIQAS-2026 — bul jaı ǵana jarys emes. Bul — daryndy ázirleýshilerdi anyqtap, otandyq úzdik ınjenerlik sheshimderdi elimizdiń qorǵanys júıesine engizýge múmkindik beretin joba. Osyndaı tehnologııalar qazirgi zamanǵy armııanyń bolashaǵyn aıqyndaıdy, — dedi ol.
Qazir polıgonda chempıonattyń testilik kezeńi ótip jatyr. Bul kezeńde komandalardyń tehnıkalyq ázirlemeleri men fınaldyq synǵa daıyndyǵy jan-jaqty baǵalanatyn bolady. Mamandar jabdyqtardyń jumysqa qabilettiligin, ınjenerlik sheshimderdiń senimdiligin jáne qatysýshylardyń kásibı daıarlyq deńgeıin tekseredi. Testilik kezeńniń qorytyndysy boıynsha fınalǵa joldama alatyn úzdik komandalar anyqtalady.
Chempıonat tórt negizgi baǵyt boıynsha uıymdastyrylǵan. Olar — «Aspan», «Jer», «Kıberqaýipsizdik» jáne «Taktıka».
«Aspan» baǵyty boıynsha qatysýshylar FPV-drondardy basqaryp, áýe barlaýyn júrgizý, júkterdi dál jetkizý sııaqty tapsyrmalardy oryndaıdy. «Jer» kezeńinde robottandyrylǵan keshenderdiń kómegimen ınjenerlik mindetterdi oryndap, shartty túrde jaralanǵandardy qaýipsiz aımaqqa evakýatsııalaý boıynsha sheberlikterin kórsetedi.
Al «Kıberqaýipsizdik» kezeńinde arnaıy polıgonda uıymdastyrylǵan kıbershabýyldarǵa qarsy turyp, aqparattyq júıelerdi qorǵaý qabiletterin synaıdy. «Taktıka» baǵyty aıasynda qatysýshylar taktıkalyq is-qımyl, atys daıyndyǵy jáne áskerı-medıtsınalyq kómek kórsetý boıynsha keshendi synaqtardan ótedi.
Chempıonattyń fınaldyq kezeńi 14-15 tamyz kúnderi «Amandyq» oqý ortalyǵynyń bazasynda ótedi. Fınalǵa aralyq irikteýden súrinbeı ótken komandalar qatysady. Olar dalalyq jaǵdaıda praktıkalyq tapsyrmalardy oryndap, ózderiniń tehnıkalyq sheshimderi men kásibı sheberlikterin synǵa salady. Fınaldyq jarys onlaın rejımde tikeleı efırde kórsetiledi.
Jeńimpazdardy qomaqty syıaqy kútip tur. Chempıonattyń jalpy júlde qory 18 mıllıon teńgeni quraıdy. Onyń ishinde birinshi oryn ıegeri 10 mıllıon teńge, ekinshi oryn 5 mıllıon teńge, al úshinshi oryn 3 mıllıon teńge alady.
«SHAIQAS-2026» chempıonatyn ótkizý bastamasy «Qazaqstan ǴAJ ortalyǵy» AQ-qa tıesili. Jarystyń operatory — «Qorǵanys jáne qaýipsizdik salasyndaǵy ınnovatsııalardy damytý ortalyǵy» JShS (Defense Tech).
Aıta keteıik, chempıonat demeýshilerdiń qarajaty men seriktesterdiń jarnalary esebinen uıymdastyrylyp otyr. Jobany ótkizý barysynda Qazaqstan Respýblıkasy Qorǵanys mınıstrliginiń bıýdjet qarajaty paıdalanylmaıdy.
«SHAIQAS-2026» — elimizdegi áskerı ınjenerııa, robototehnıka, ushqyshsyz tehnologııalar jáne kıberqaýipsizdik salalaryn damytýǵa baǵyttalǵan alǵashqy iri chempıonat. Qazirdiń ózinde bul joba ınnovatsııalyq sheshimderdi tájirıbede synap, olardy qorǵanys júıesine engizýge jol ashatyn mańyzdy bastama retinde baǵalanyp otyr.
Buǵan deıin Qorǵanys mınıstrligi qazaqstandyqtarǵa aldaǵy áskerı oqý-jattyǵýlar týraly eskertý jasady.
