Elde alǵash ret rezıdentýraǵa granttar tsıfrlyq júıe arqyly bólindi
ASTANA. KAZINFORM — Qazaqstanda rezıdentýraǵa grant bólý alǵash ret tsıfrlyq platforma arqyly ótti, dep habarlaıdy QR Densaýlyq saqtaý mınıstrliginiń baspasóz qyzmeti
Densaýlyq saqtaý mınıstrligi 2026–2027 oqý jylyna medıtsınalyq mamandyqtar boıynsha rezıdentýraǵa respýblıkalyq bıýdjet qarajaty esebinen bilim berý granttaryn bólý jónindegi konkýrstyń qorytyndysyn shyǵardy.
Bıyl «Rezıdentýranyń tsıfrlyq platformasy» aqparattyq júıesi arqyly barlyǵy 12 575 ótinish kelip tústi. Onyń ishinde 8 548 talapker 2 500 bilim berý grantyna arnalǵan konkýrsqa qatysýǵa jiberildi.
— Júrgizilgen reıtıng nátıjeleri boıynsha 2 384 grant bólindi. Igerilmeı qalǵan 116 grant boıynsha 27–28 tamyzda qosymsha konkýrs ótkiziledi. Onyń qorytyndysy 29 tamyzda belgili bolady, — delingen habarlamada.
Bıyl rezıdentýraǵa qabyldaý alǵash ret tsıfrlyq platforma arqyly júzege asyrylyp jatyr. Konkýrstyq irikteý úlgerimniń ortasha baly (GPA) men qorytyndy memlekettik attestattaý nátıjeleri eskerile otyryp, avtomattandyrylǵan rejımde júrgiziledi. Qabyldaý rásimin tsıfrlandyrý konkýrs úderisiniń ashyqtyǵyn arttyrýǵa, bilim berý granttaryn obektıvti bólýge jáne medıtsınalyq kadrlardy daıarlaýdy tıimdi josparlaýǵa baǵyttalǵan.
2026 jyldan bastap talapkerler úshin de múmkindikter keńeıtildi: talapkerler bir mezgilde tórt mamandyq boıynsha tórt bilim berý uıymyna qujat tapsyrý múmkindigine ıe boldy. Rezıdentýrada mamandar daıarlaýǵa arnalǵan memlekettik bilim berý tapsyrysy densaýlyq saqtaý júıesiniń naqty kadrlyq qajettilikterin eskere otyryp qalyptastyrylady. Oryndar sanyn aıqyndaý kezinde jergilikti atqarýshy organdardyń ótinimderi, mamandar tapshylyǵy, sondaı-aq jańadan iske qosylatyn densaýlyq saqtaý obektileri úshin kadrlarǵa qajettilik eskeriledi.
Eń kóp suranysqa ıe mamandar qatarynda anestezıologııa jáne reanımatologııa, jalpy hırýrgııa, terapııa, pedıatrııa, kardıologııa, onkologııa, nevrologııa, radıologııa, neonatologııa, travmatologııa jáne ortopedııa, sondaı-aq basqa da klınıkalyq mamandyqtar bar.
2026–2027 oqý jylyna arnalǵan memlekettik bilim berý tapsyrysy rezıdentýranyń 57 mamandyǵy boıynsha qalyptastyryldy. Atap aıtqanda:
- akýsherııa jáne gınekologııa boıynsha — 231 oryn,
- anestezıologııa jáne reanımatologııa boıynsha — 148,
- jalpy hırýrgııa boıynsha — 140,
- terapııa boıynsha — 122,
- pedıatrııa boıynsha — 113,
- onkologııa boıynsha — 111,
- kardıologııa boıynsha — 102,
- radıologııa boıynsha — 86,
- nevrologııa boıynsha — 84
- jáne neonatologııa boıynsha — 75 oryn qarastyrylǵan.
Rezıdentýra baǵdarlamalary boıynsha mamandardy medıtsınalyq ýnıversıtetter, ǵylymı-zertteý ınstıtýttary, ulttyq ǵylymı ortalyqtar jáne kópsalaly joǵary oqý oryndarynyń medıtsınalyq fakýltetteri daıarlaıdy.
Memlekettik granttardyń eń kóp sany eldiń jetekshi medıtsınalyq joǵary oqý oryndary arasynda bólindi:
- S. D. Asfendııarov atyndaǵy Qazaq ulttyq medıtsına ýnıversıtetine — 517 grant,
- Astana medıtsına ýnıversıtetine — 332,
- Semeı medıtsına ýnıversıtetine — 297,
- M. Ospanov atyndaǵy Batys Qazaqstan medıtsına ýnıversıtetine — 290,
- Qaraǵandy medıtsına ýnıversıtetine — 212 grant.
Sonymen qatar, 2026 jylǵy 12–17 tamyz aralyǵynda jergilikti atqarýshy organdardyń (JAO) granttaryna konkýrsqa qatysý úshin ótinishter qabyldanyp jatyr. Bıyl 18 óńir (Túrkistan oblysy men Shymkent qalasyn qospaǵanda) jalpy sany 900 grant bóldi. JAO granttaryna respýblıkalyq bıýdjet esebinen qarjylandyrylatyn memlekettik bilim berý tapsyrysy sheńberinde oqýǵa túspegen tulǵalar qatysa alady. 18 tamyzda JAO granttary boıynsha reıtıng nátıjeleri jarııalanady.
Rezıdentýraǵa memlekettik bilim berý tapsyrysyn qalyptastyrý — densaýlyq saqtaý júıesin bilikti medıtsınalyq kadrlarmen qamtamasyz etýdiń negizgi tetikteriniń biri. Oryndardyń sany men beıini óńirlerdiń qazirgi jáne perspektıvalyq qajettilikteri, sondaı-aq eldegi medıtsınalyq ınfraqurylymnyń damý perspektıvalary eskerile otyryp aıqyndalady.
Sonymen qatar, aqyly oqý boıynsha qujattardy qabyldaý jalǵasady. Qujattardy 25 tamyzǵa deıin 1 337 orynǵa tapsyrýǵa bolady. Reıtıng nátıjeleri 27 tamyzda jarııalanady. Odan keıin 29–30 tamyz aralyǵynda jergilikti atqarýshy organdardyń ıgerilmegen granttaryn qaıta bólý boıynsha konkýrsqa qatysýǵa ótinishter qabyldanady. Atalǵan granttar boıynsha qorytyndy reıtıng nátıjeleri 31 tamyzda jarııalanady.
Osylaısha, negizgi konkýrs aıaqtalǵannan keıin talapkerlerge qalǵan bilim berý granttaryn bólýge qatysý jáne rezıdentýraǵa oqýǵa túsý úshin birneshe qosymsha múmkindik beriledi.
Buǵan deıin Qazaqstanda medıtsınalyq rezıdentýraǵa qabyldaý tolyq tsıfrlyq formatqa kóshetini aıtyldy.
