Elde alǵash ret qaraǵandylyq veterınarlar ıttiń jambas-san býynyna ota jasady
QARAǴANDY. KAZINFORM — Asa kúrdeli ári biregeı operatsııa aýyr dıagnoz qoıylǵan iri ıtke qalypty ómirge qaıta oralýǵa múmkindik berip, elimizdegi veterınarııalyq medıtsınanyń sapalyq turǵydan jańa deńgeıge kóterilgenin kórsetip otyr.
Qaraǵandy qalasynda veterınar mamandar elimiz tarıhynda alǵash ret ıtke jambas-san býynyn totaldy endoprotezdeý operatsııasyn sátti júzege asyrdy. Ota alty jastaǵy, salmaǵy shamamen 35 kılogramm bolatyn Djesı esimdi nemis ovcharkasyna jasaldy. It birneshe jyl boıy aýyr dárejedegi artroz dertimen aýyrǵan.
Jambas-san býynynyń artrozy — býyn qurylymynyń birtindep buzylýymen jáne údemeli aýyrsyný sındromymen sıpattalatyn, emdeýge kelmeıtin aýrý. Ýaqyt óte kele janýardyń qozǵalý qabileti shektelip, dári-dármekpen emdeý tıimsiz bola bastaıdy. Djesıdiń jaǵdaıynda aýyrsynýsyz qozǵalý múmkindigin qalpyna keltirýdiń jalǵyz joly — zaqymdanǵan býyndy tolyqtaı protezben almastyrý boldy.
Eldegi alǵashqy osyndaı kúrdeli operatsııany Máskeýde arnaıy kásibı taǵylymdamadan ótken veterınar dáriger, hırýrg-ortoped Evgenıı Krıýkov jasady. Onyń aıtýynsha, mundaı dıagnozdarmen iri tuqymdy ıtterdiń ıeleri veterınarııalyq klınıkalarǵa jıi júginedi.
— Bizge artrozdyń asqynǵan túrleri, jambas súıegi moınynyń synýy, jambas-san býynynyń zaqymdanýy, sonyń ishinde jaraqattan keıingi jaǵdaılarmen naýqastar jıi jetkiziledi. Bul patologııalar árdaıym ómirge tikeleı qaýip tóndirmese de, onyń sapasyn edáýir tómendetedi. Janýar úzdiksiz aýyrsynýmen ómir súredi, al ıeleri onyń qınalǵanyn kún saıyn kóredi, — dep túsindirdi maman.
Operatsııa barysynda Djesıge tıtannan jasalǵan zamanaýı protez ornatyldy. Ol san súıeginiń ózegine arnaıy vıntter arqyly bekitiledi. Býynnyń tolyqqandy qyzmetine oralýy úshin súıek tini men protezdiń bitisýine belgili bir ýaqyt qajet. Ádette bul úderis bir jarymnan eki aıǵa deıin sozylady, al tolyq ıntegratsııa úsh aı ishinde aıaqtalady. Osy kezeńnen keıin janýar belsendi ómir saltyna eshqandaı shekteýsiz qaıta orala alady.
Alǵashqy baqylaý nátıjeleri úmit kúttirerlik. Operatsııadan keıingi besinshi kúni ovcharka ota jasalǵan aıaǵyn abaılap tireı bastaǵan. Aqsaý men aýyrsyný sındromy saqtalǵanyna qaramastan, oń dınamıka anyq baıqalǵan. Al 15 kún ótken soń Djesı belsendi qozǵalyp, ıesine qaraı volerden ózdiginen shyǵa bastaǵan.
— Bul jaqsy nátıje, ásirese ıttiń salmaǵyn eskersek, óte joǵary kórsetkish. Rezektsııalyq artroplastıka sekildi balama ádister qoldanylǵan jaǵdaıda iri janýarlar kóbine ómir boıy aqsańdap júredi nemese múlde aıaqqa tura almaı qalady. Salmaǵy 20 kılogramnan asatyn ıtterge mundaı operatsııalar, ádette, usynylmaıdy. Al endoprotezdeý kezinde biz nebári eki apta ishinde rezektsııa arqyly qol jetkizý múmkin emes tirek qabiletin kórip otyrmyz, — dep atap ótti Evgenıı Krıýkov.
Aldaǵy ýaqytta Djesıge ekinshi jambas-san býynyn almastyrý operatsııasyn júrgizý josparlanyp otyr. Qazirgi tekserýler ornatylǵan protezdiń birtindep bitisip kele jatqanyn jáne ıttiń jalpy jaǵdaıy turaqty túrde jaqsaryp jatqanyn kórsetedi.
Veterınardyń aıtýynsha, bul operatsııa janýardyń ómir súrý uzaqtyǵyn arttyrýdan góri, onyń ómir sapasyn túbegeıli ózgertedi.
— Artrozdyń ózi ólimge alyp kelmeıdi. Alaıda janýar uzaq ýaqyt boıy aýyrsyný men jaısyzdyqta ómir súredi. Biz aýyrsyný kózin joıǵan kezde naýqasqa erkin ári tolyqqandy ómir súrýge múmkindik beremiz. Basty maqsatymyz da osy, — dep sózin túıindedi maman.
Sondaı-aq Evgenıı Krıýkov Qazaqstanda mundaı operatsııanyń alǵash ret sátti jasalýy otandyq veterınarııalyq medıtsınanyń qarqyndy damyp kele jatqanyn dáleldeıtinin atap ótti. Klınıka zamanaýı qural-jabdyqtarmen tolyq qamtamasyz etilip, tájirıbeli hırýrgtar men anestezıologtardan quralǵan kásibı komanda jasaqtalǵan. Bul kúrdeli hırýrgııalyq aralasýlardy barynsha tómen táýekelmen júrgizýge múmkindik beredi.
— Biz úshin bul — mańyzdy kezeń. Biz janýarlardyń ómir sapasyn jaqsartýǵa baǵyttalǵan jańa múmkindikterdi úzdiksiz izdeımiz. Ielerinde tańdaý bolsa, al janýarlarda aýyrsynýsyz ómir súrýge naqty múmkindik bolýy tıis, — dep qorytyndylady Evgenıı Krıýkov.
Eske sala ketsek, osyǵan deıin Pavlodarda ıisshil ıtterdiń kómegimen 200-den astam qylmys ashylǵanyn habarlaǵanbyz.