Elde aldaǵy jeti jylǵa elektr energııasyna shekti tarıfterdiń ósýi toqtatylmaq

ASTANA. KAZINFORM — Energetıka mınıstrligi «Elektr energııasyna shekti tarıfterdi bekitý týraly» buıryq jobasyn daıarlady. 

— Osy buıryqta 2026-2032 jyldarǵa arnalǵan elektr energııasyna shekti tarıfterdi 2025 jylǵy elektr energııasyna shekti tarıfter deńgeıinde bekitý kózdelgen, — delingen qujatta. 

Vedomstvo aqparatyna qaraǵanda, shekti tarıfterdi 2026-2032 jyldarǵa bekitý biryńǵaı satyp alýshynyń baǵasyna áser etpeıdi. Sebebi onyń mejesi 2025 jylǵy deńgeıde qarastyrylǵan.

— Bıyǵy 8 qazanda Memleket basshysynyń tóraǵalyǵymen ekonomıkalyq damý sapasyn arttyrý jáne baǵa turaqtylyǵyn qamtamasyz etý máseleleri boıynsha keńes ótip, onyń qorytyndysy boıynsha makroekonomıkalyq turaqtylyq jóninde sharalar qabyldaý tapsyryldy. Osyǵan baılanysty elektr energııasyna shekti tarıfterdiń ósýin toqtatý týraly sheshim qabyldandy, — dep naqtylandy qujatta.

Bul turǵyda atalǵan sheshimge qatysty bekitilgen tarıfter 2026 jylǵy 1 qańtardan bastap kúshine enedi. Shekti tarıfterdiń qoldanylý kezeńi — 2026-2032 jyldar.

Osy qujat jobasy Ashyq NQA portalynda 17 jeltoqsanǵa deıin talqylaýǵa shyǵaryldy.

Budan buryn habarlanǵandaı, Prezıdent Qasym-Jomart Toqaev Premer-mınıstr Oljas Bektenovke azamattardyń múddesin eskere otyryp, Úkimettiń ekonomıkalyq reformalar baǵdarlamasyn iske asyrý úderisin retteýge qatysty naqty josparlar ázirleýdi tapsyrdy. 

Atap aıtqanda, benzın men tarıf baǵasyna moratorıı engizilip, ıpoteka kólemi ulǵaıady.