Elde agrobızneske 1%-dyq jeńildetilgen nesıe berý qaǵıdalary jańartyldy
ASTANA. KAZINFORM — Qazaqstanda agroónerkásiptik keshendegi jobalardy qarjylandyrý tártibine ózgerister engizilip, aýyl sharýashylyǵy óndirisin keńeıtý men jańǵyrtýǵa baǵyttalǵan jańa kredıtteý qaǵıdalary bekitildi, dep habarlaıdy Kazinform tilshisi.
Tıisti ózgerister QR Aýyl sharýashylyǵy mınıstriniń 2026 jylǵy 15 maýsymdaǵy buıryǵymen engizildi.
Qujatqa sáıkes, bıýdjettik kredıtteý aıasynda jergilikti atqarýshy organdarǵa respýblıkalyq bıýdjetten qaıtarymdy, merzimdi, aqyly jáne qamtamasyz etilgen negizde qarajat bólinedi. Kredıt merzimi 1% jyldyq mólsherlememen 10 jylǵa deıin belgilengen.
Qarjy agroónerkásiptik keshendegi jobalardy iske asyrýǵa jáne keńeıtýge baǵyttalady. Atap aıtqanda, sút-taýar fermalaryn, et jáne jumyrtqa baǵytyndaǵy qus fabrıkalaryn, etti mal sharýashylyǵy kásiporyndaryn, bordaqylaý alańdaryn, et óńdeý óndiristerin, kókónis jáne jemis saqtaý qoımalaryn, jylyjaı keshenderin, aýyl sharýashylyǵy ónimderin tereń óńdeý nysandaryn salý, sondaı-aq akvaósirý men qoı sharýashylyǵyn damytý kózdelgen.
Negizgi qaryzdy óteý boıynsha jeńildik kezeńi 24 aıǵa deıin, al bıýdjettik kredıtti ıgerý merzimi qarajat aýdarylǵan sátten bastap 18 aıǵa deıin belgilendi.
Sonymen qatar qoldanystaǵy baǵdarlamalar aıasynda qaıtarylǵan qarajat esebinen kredıtterdi kredıttik shart merziminen aspaıtyn kezeńge berý múmkindigi engizildi.
Jańa talaptarǵa sáıkes, kredıt qarajatyn aýyl sharýashylyǵy tehnıkasyn satyp alýǵa jáne aınalym qarajatyn, sonyń ishinde bordaqylaýǵa arnalǵan mal alýǵa paıdalanýǵa bolmaıdy.
Jergilikti bıýdjet esebinen qarjylandyrylatyn jobalar boıynsha ákimdikter óńir qajettilikteri men tıimdilik kórsetkishterin eskere otyryp, basym baǵyttardy ózderi aıqyndaıdy.
Respýblıkalyq bıýdjet qarajaty esebinen bir jobaǵa beriletin kredıttiń eń joǵary kólemi 5 mlrd teńgege deıin belgilengen. Mundaı nesıeler boıynsha nomınaldy syıaqy mólsherlemesi jyldyq 2,5%-dy quraıdy.
Jobalardy irikteýdiń negizgi ólshemderi retinde olardyń áleýmettik-ekonomıkalyq mańyzy, jańa jumys oryndaryn qurýy, ótinish berýshiniń tájirıbesi, qarjylyq turaqtylyǵy, kepildik múliktiń bolýy jáne joba qunynyń keminde 10%-yn quraıtyn birlesken qarjylandyrý qarastyrylǵan.
Sondaı-aq 2026 jylǵy 1 shildeden bastap qurylys zańnamasyna sáıkes jobalardyń oń saraptamalyq qorytyndysynyń bolýy mindetti talapqa aınalady.
Buıryq 2026 jylǵy 29 maýsymnan bastap kúshine enedi. Al jekelegen normalar 1 shildeden bastap qoldanysqa engiziledi.
Buǵan deıin habarlanǵandaı, agroónerkásip kesheniniń eksporttyq túsimi 7 mlrd AQSh dollaryna jetti.
