Elde 9 myńnan astam akýsher eńbek etedi

ASTANA. KAZINFORM — Qazaqstanda 9 myńnan astam akýsher eńbek etedi, olardyń 64%-y qalada, 36%-y aýylda jumys isteıdi. 

Qazaqstanda jyl saıyn orta eseppen 370 myńǵa jýyq bosaný qabyldanady jáne árbir osy keremettiń artynda akýsherlerdiń eńbegi, qamqorlyǵy men biliktiligi jatyr.

— Olar bolashaq analardy perzenthanaǵa túsken sátten bastap shyǵarylǵanǵa deıin qamqorlyq jasap, tek medıtsınalyq emes, moraldyq qoldaý da kórsetedi. Bul — áıelder men olardyń sábıleri úshin eń tolqynysty ári mańyzdy sátterde janynda bolatyn naǵyz qaharmandar, — delingen DSM habarlamasynda.

Qazaqstandaǵy bosandyrý júıesi týraly derekter:

Elimizde 240 bosandyrý uıymy, onyń ishinde 58 perzenthana jáne 37 perınataldyq ortalyq jumys isteıdi.

Ambýlatorııalyq kómekti 810 áıelder konsýltatsııasy, 1 282 dárigerlik ambýlatorııa jáne 790 feldsherlik-akýsherlik pýnkt kórsetedi.

Qazaqstanda 9 myńnan astam akýsher eńbek etedi, olardyń 64%-y qalada, 36%-y aýylda jumys isteıdi.

Perzenthanalarda 3 740 akýsher, al medıtsınalyq-sanıtarııalyq alǵashqy kómek deńgeıinde 3 675 akýsher qyzmet etedi.

600-den astam akýsher shalǵaı jerlerde feldsherlik-akýsherlik pýnktterde qyzmet kórsetip otyr.

Halyqaralyq akýsherler kúnin belgileý týraly ıdeıa 1987 jyly usynylyp, 1992 jyly resmı túrde moıyndaldy. Qazaqstanda bul kúnniń de ózindik mańyzy zor — árbir qýanyshty sábıdiń dúnıege kelýiniń artynda óz isine muqııat, tájirıbeli jáne adal akýsherler tur. 

Aıta ketelik aýyldarda dáriger tapshylyǵy máselesi qalaı sheshilip jatqany týraly jazyp edik.