Elde 8,9 mln gektar aýyl sharýashylyǵy daqyldary egildi
ASTANA. KAZINFORM — Óńirlerde kóktemgi dala jumystary jalǵasyp jatyr. Oblys ákimdikteriniń jedel derekterine sáıkes, búgingi kúni aýyl sharýashylyǵy daqyldary 8,9 mln gektar alqapqa egildi.
Atap aıtqanda: dándi daqyldar 5,5 mln gektarǵa, maıly daqyldar 2,3 mln gektarǵa, mal azyqtyq daqyldar 642 myń gektarǵa, maqta 166 myń gektarǵa, kókónis daqyldary 102 myń gektarǵa, baqsha daqyldary 77 myń gektarǵa, kartop 93 myń gektarǵa, qant qyzylshasy 22 myń gektarǵa egildi.
Negizgi astyq egetin óńirlerde egis naýqany belsendi kezeńde jalǵasyp jatyr.
Máselen, Aqmola oblysynda 2 mln gektar, Qostanaı jáne Soltústik Qazaqstan oblystarynda 1,3 mln gektar jerge egin egildi.
— Joǵary qarqyn ońtústik jáne ońtústik-shyǵys óńirlerde de baıqalady. Bul aımaqtarda kóktemgi dala jumystary aıaqtalýǵa jaqyn. Jambyl oblysynda jumystar 98,1%-ǵa, Jetisý oblysynda 97,5%-ǵa oryndaldy. Al Almaty oblysynda egis naýqany 96,1%-ǵa aıaqtaldy.
Jalpy, elimizdiń aýyl sharýashylyǵy qurylymdarynda 133,9 myń traktor, shamamen 5,6 myń joǵary ónimdi egis kesheni, 71,4 myń sepkish jáne 188,5 myń topyraq óńdeý quraly bar. Agrarshylarǵa úzdiksiz tehnıkalyq qoldaýdy 70 servıstik ortalyq kórsetip jatyr, — delingen AShM habarlamasynda.
Egis naýqanyn daıyndaý men ótkizýdegi negizgi baǵyttardyń biri — aýyl sharýashylyǵy taýaryn óndirýshilerdi mıneraldy tyńaıtqyshtarmen qamtamasyz etý.
2026 jylǵa arnalǵan tyńaıtqysh engizý jospary 2,3 mln tonna. Ákimdikterdiń jedel derekterine sáıkes, búgin 1,4 mln tonna tyńaıtqysh jetkizýge kelisimsharttar jasalyp, 1,2 mln tonnasy jóneltildi.
Agrarshylar úshin tyńaıtqyshtardyń qoljetimdiligin arttyrý maqsatynda óńirlerdiń jergilikti bıýdjetterinde 2026 jylǵa tyńaıtqysh qunyn sýbsıdııalaýǵa 56,3 mlrd teńge qarastyrylǵan.
Aıta ketelik Túrkistan oblysynda sharýalar jylyjaı qyzanaǵyn ótkize almaı otyrǵany týraly jazǵan edik.
