Elde 8,6 mln tonna astyq bastyryldy
ASTANA. KAZINFORM — Qazaqstanda egin jınaý naýqany jalǵasyp jatyr. Búginde dándi jáne dándi-burshaqty daqyldar egilgen alqaptardyń 81,5%-y jınaldy.
Ortasha ónimdilik gektaryna 14,6 tsentner bolyp, 18,6 mln tonna astyq bastyryldy.
Bıyl elimdegi jalpy egis alqaby 24,2 mln gektarǵa jetti. Bul ótken jylmen salystyrǵanda 600 myń gektarǵa kóp. Onyń 15,6 mln gektaryna dándi daqyldar, 5,2 mln gektaryna maıly daqyldar, 3 mln gektaryna mal azyqtyq daqyldar egildi. Maqta 173,6 myń gektarǵa, qant qyzylshasy 23,8 myń gektarǵa egildi.
Qazirgi ýaqytta dándi jáne dándi-burshaqty daqyldar 12,7 mln gektar alqaptan jınaldy.
Egin jınaý kezinde alynǵan ónimniń kólemi ǵana emes, onyń sapasy da mańyzdy.
Jańa ónimniń 4,9 mln tonnasy lıtsenzııalanǵan astyq qabyldaý kásiporyndaryna ótkizildi. Bul ótken jyldyń osy kezeńimen salystyrǵanda 20%-ǵa kóp. Byltyr osy ýaqytta 4,1 mln tonna astyq qabyldanǵan bolatyn.
Qabyldanǵan astyqtyń 74%-y — 3-synypty astyq. 4-synypty astyqtyń úlesi — 20%, al 5-synypty astyq — 6%.
Bıdaıdyń kleıkovına mólsheri de joǵary deńgeıde. Zerttelgen jumsaq bıdaıdyń 48%-yndaǵy kleıkovına mólsheri 28%-dan asty. Úlgilerdiń 25%-ynda bul kórsetkish 25–27%, al 27%-ynda 23–24% boldy.
Sonymen birge maıly daqyldardy jınaý jumystary da qarqyn alyp keledi. Qazir 2,2 mln gektar alqap jınalyp, 2,2 mln tonna maıly daqyl ónimi alyndy.
Basqa aýyl sharýashylyǵy daqyldaryn jınaý jumystary da jalǵasyp jatyr. Qazirdiń ózinde 2,9 mln tonna kókónis, 2,5 mln tonna kartop jáne 2,3 mln tonna baqsha daqyldary jınaldy.
Egin jınaý naýqanyna óńirlerde 130 myń traktor, 29 myń astyq jınaıtyn kombaın, 17 myń jatka jáne ózge de 130 myń aýyl sharýashylyǵy tehnıkasy qatysyp jatyr.
Aýyl sharýashylyǵy taýaryn óndirýshilerdi mıneraldy tyńaıtqyshtarmen qamtamasyz etý jumystary da jalǵasýda.
2026 jylǵa 2,3 mln tonna tyńaıtqysh engizý josparlanǵan. Ákimdikterdiń jedel málimetine sáıkes, qazirdiń ózinde 2,1 mln tonna tyńaıtqyshty jóneltý jóninde kelisimshart jasaldy. Bul jospardyń 90%-yna teń.
Aýyl sharýashylyǵy mınıstrligi óńir ákimdikterimen birlesip, egin jınaý qarqynyn, jańa ónimniń sapasyn jáne sharýalardyń qajetti tehnıka men materıaldyq resýrstarǵa qoljetimdiligin baqylaýdy jalǵastyryp jatyr.
Aıta ketelik sharýalar qysqa qalaı qamdanyp jatqany týraly jazǵan edik.
