Elde 7,4 myń júrgizýshi densaýlyǵyna baılanysty kólik aıdaý quqyǵynan aıyryldy
ASTANA. KAZINFORM — Qazaqstanda 21 myńnan astam júrgizýshiniń kólik quralyn basqarýǵa medıtsınalyq qarsy kórsetilimi bary anyqtaldy. Bul týraly Densaýlyq saqtaý mınıstrligi habarlady.
Vedomstvo Іshki ister mınıstrligimen birlesip, jol qaýipsizdigin qamtamasyz etý maqsatynda júrgizýshilerdiń densaýlyq jaǵdaıyna qatysty málimetterdi tekserip jatyr.
Búginde medıtsınalyq qarsy kórsetilimderi anyqtalǵan 21 myńnan astam júrgizýshi tirkelgen. Sonymen qatar 2 246 adam ártúrli negizder boıynsha dıspanserlik esepten shyǵaryldy.
13 myńnan astam adamǵa qatysty aýmaqtyq polıtsııa departamentteri sotqa talap-aryz bergen. Zańdy kúshine engen sot sheshimderiniń negizinde 7,4 myń júrgizýshi kýáligi jaramsyz dep tanyldy.
Mınıstrlik ókilderi júrgizýshiniń boıynan qandaı da bir dıagnozdyń anyqtalýy kólik júrgizý quqyǵynan avtomatty túrde aıyrylady degendi bildirmeıtinin eskertti.
Shekteý adamnyń densaýlyq jaǵdaıy kólikti qaýipsiz basqarýǵa áser etýi múmkin bolǵan jaǵdaıda ǵana qoldanylady. Al júrgizýshi kýáliginiń kúshin toqtatý týraly túpkilikti sheshimdi sot qabyldaıdy.
Kólik basqarýǵa medıtsınalyq qarsy kórsetilimderdiń tizbesi Densaýlyq saqtaý mınıstrliginiń № 853 buıryǵymen bekitilgen.
— Absolıýttik qarsy kórsetilimder qataryna kólikti qaýipsiz basqarýǵa múmkindik bermeıtin keıbir aýrýlar men jaǵdaılar jatady. Olardyń ishinde epılepsııa, eki kózdiń kórmeýi, keıbir aýyr psıhıkalyq buzylystar, sondaı-aq psıhoaktıvti zattardy qoldanýǵa baılanysty belgili bir psıhıkalyq jáne minez-qulyqtyq buzylystar bar. Bul rette kórý, estý nemese tirek-qımyl apparatynyń jekelegen buzylystary kezinde arnaıy talaptardy oryndap nemese beıimdeý quraldaryn paıdalanyp, kólik basqarýǵa ruqsat etilýi múmkin. Mysaly, kózildirik, baılanys lınzalary, estý apparaty nemese qolmen basqarý qurylǵylary qoldanylýy múmkin, — delingen habarlamada.
Júrgizýshiden medıtsınalyq qarsy kórsetilim anyqtalyp, zańnamada kózdelgen negizder bolsa, aqparat ishki ister organdaryna beriledi. Odan keıin tıisti negizder bolǵan jaǵdaıda polıtsııa sotqa júginedi.
Eske salaıyq, buǵan deıin Astanada mas kúıinde kólik júrgizgen er adam bir jylǵa sottalǵanyn habarlaǵanbyz.
