Elde 57 jańa mektep ashyldy
ASTANA. KAZINFORM – 2026-2027 oqý jylynda elimizdegi 8 myńnan astam mektepte 4,1 mln bala bilim alady. Onyń ishinde 380 myńnan astam bala 1-synypqa barady.
Memleket basshysy Qasym-Jomart Toqaevtyń tapsyrmasyna sáıkes elimizde bilim berý ınfraqurylymyn damytý jáne jańǵyrtý baǵytyndaǵy júıeli jumys jalǵasýda. Negizgi mindet — oqýshy oryndarynyń tapshylyǵyn azaıtyp, balalardyń qaýipsiz ári jaıly ortada bilim alýyna jaǵdaı jasaý.
Jańa oqý jyly qarsańynda 62 myń oqýshy ornyna arnalǵan 57 jańa mektep paıdalanýǵa berildi. Jańa nysandardyń ashylýy qoldanystaǵy mektepterdiń júktemesin azaıtyp, balalardyń zamanaýı jaǵdaıda bilim alýyna múmkindik beredi.
— Jańa mektepterdiń eń kóbi Almaty qalasynda, Batys Qazaqstan, Almaty, Qaraǵandy, Aqtóbe jáne Túrkistan oblystarynda ashyldy. Olarda oqý sabaqtaryn ótkizýge, sportpen shuǵyldanýǵa, sondaı-aq oqýshylardyń shyǵarmashylyq jáne tehnıkalyq daǵdylaryn damytýǵa qajetti jaǵdaılar qarastyrylǵan, — delingen mınıstrlik habarlamasynda.
Apatty jáne úsh aýysymdy mektepter máselesin sheshý jumystary da jalǵasyp jatyr. Qurylys Arnaýly memlekettik qordyń, Bilim berý ınfraqurylymyn qoldaý qorynyń, jergilikti bıýdjetterdiń qarajaty jáne tartylǵan jeke ınvestıtsııalar esebinen júrgizilýde.
Sonymen qatar Memleket basshysy Qasym-Jomart Toqaevtyń tapsyrmasymen 1300 mektepti renovatsııalaý baǵdarlamasy júzege asyrylýda. Baǵdarlama mektep ǵımarattary men materıaldyq-tehnıkalyq bazany jańartýdy, qaýipsizdik deńgeıin arttyrýdy jáne zamanaýı bilim berý ortasyn qalyptastyrýdy kózdeıdi.
Bilim berý ınfraqurylymynyń tapshylyǵyn kezeń-kezeńimen azaıtý jáne elimizdiń barlyq óńirinde balalardyń bilim alýyna teń jaǵdaı jasaý baǵytyndaǵy jumys jalǵasady.
Aıta ketelik jańa oqý jylynda qandaı ózgeris bolatyny týraly jazǵan edik.
