Elde 5,6 myń shaqyrym elektr jelisi jóndeldi
ASTANA. KAZINFORM — 2026–2027 jyldardaǵy kúzgi-qysqy kezeńge daıyndyq josparly túrde júrgizilip jatyr.
Energetıka mınıstrliginiń Memlekettik energetıkalyq qadaǵalaý jáne baqylaý komıtetinde óńirlik elektr jelilik kompanııalarynyń basshylarymen jumys keńesi ótti. Keńeste aldaǵy jylytý maýsymyna daıyndyq, elektr jelileriniń senimdiligin arttyrý jáne óńirlik elektr jelilik kompanııalary qyzmetiniń tıimdiligin kúsheıtý máseleleri qaraldy.
Komıtet tóraǵasy Erjan Ertaev elektr jelileriniń senimdi jumysy elimizdiń energetıkalyq qaýipsizdigin qamtamasyz etýdiń jáne tutynýshylardy úzdiksiz elektr energııasymen jabdyqtaýdyń negizgi sharttarynyń biri ekenin atap ótti. Jylytý maýsymy qarsańynda jóndeý naýqanyn ýaqtyly ári sapaly júrgizýge jáne energııa júıesiniń turaqty jumysyn qamtamasyz etýge erekshe nazar aýdarylýda.
Keńeste ótken jylytý maýsymynyń qorytyndysy boıynsha 17 myń shaqyrymnan astam elektr berý jelisi, 420 qosalqy stantsııa jáne 3 599 taratý jáne transformatorlyq qosalqy stantsııa tolyq kólemde jóndelgeni atap ótildi. Atqarylǵan jumystardyń nátıjesinde tehnologııalyq buzýshylyqtar sany 5%-ǵa azaıyp, óńirlik elektr jelilik kompanııalary jelileri arqyly elektr energııasyn berý kólemi 4%-ǵa artty.
2026–2027 jyldardaǵy kúzgi-qysqy kezeńge daıyndyq josparly túrde júrgizilip jatyr. Bıyl 17 098 shaqyrym elektr berý jelisine, 444 qosalqy stantsııaǵa jáne 3 408 taratý, transformatorlyq jáne keshendi transformatorlyq qosalqy stantsııaǵa kúrdeli jóndeý júrgizý josparlanǵan. Búgingi tańda 5 600 shaqyrymnan astam elektr berý jelisi, 121 qosalqy stantsııa jáne 1 215 taratý, transformatorlyq jáne keshendi transformatorlyq qosalqy stantsııa jóndeldi.
Keńes barysynda elektr energetıkasy salasyndaǵy normatıvtik-quqyqtyq bazany odan ári jetildirý máseleleri de qaraldy. Elektr energııasyn berý qyzmetin lıtsenzııalaý, elektr jelilik ınfraqurylymdy jańǵyrtý tetikterin damytý, sondaı-aq elektr jelilerin paıdalanýdyń tıimdiligin arttyrý jáne salanyń kadrlyq áleýetin nyǵaıtý jónindegi usynystar talqylandy.
Sonymen qatar óńirlik elektr jelilik kompanııalardyń qazirgi jaǵdaıyna taldaý jasaldy. Elektr jelileriniń tehnıkalyq jaı-kúıi, jóndeý jáne jańǵyrtý jumystarynyń kólemi, elektrmen jabdyqtaýdyń senimdiligi sııaqty negizgi óndiristik kórsetkishter qaraldy. Talqylaý qorytyndysy boıynsha kásiporyndar jumysynyń tıimdiligin odan ári arttyrýdyń basym baǵyttary aıqyndaldy.
Keńesti qorytyndylaǵan Erjan Ertaev jylytý maýsymyna daıyndyq tek qysqa merzimdi is-sharalarmen shektelmeýi tıis ekenin atap ótti. Árbir kásiporyn elektr jelilik ınfraqurylymdy kezeń-kezeńimen jańǵyrtýǵa, jabdyqtardyń tozýyn júıeli túrde tómendetýge, jańǵyrtý kólemin ulǵaıtýǵa jáne elektrmen jabdyqtaý senimdiligin arttyrýǵa baǵyttalǵan uzaq merzimdi damý strategııasyn qalyptastyrýy qajet ekenin aıtty.
Aıta ketelik energetıkalyq ınfraqurylym obektileri kúzet aımaqtarynyń biryńǵaı tsıfrlyq tizilimi qurylady.
