Elde 4300-den astam adam, onyń ishinde 121 bala aǵza transplantatsııasyn kútip otyr
ALMATY. KAZINFORM — Jaqyn arada balalarǵa júrek pen baýyr transplantatsııasyn júrgizý, sondaı-aq aǵza keshenderin transplantattaý josparlanǵan. Bul týraly DSM baspasóz qyzmeti habarlady.
Astanadaǵy Ulttyq ǵylymı onkologııa ortalyǵynda Aǵza donorlyǵy men transplantatsııasynyń Eýropalyq kúnine oraılastyrylǵan «Úmit syılaǵan sheshim» forýmy ótti.
— Transplantologııany damytý — densaýlyq saqtaý salasyndaǵy memlekettik saıasattyń strategııalyq baǵyty. Búgingi kúni transplantatsııa kóptegen jaǵdaılarda aýyr sozylmaly aýrýlardy emdeýdiń jalǵyz tıimdi ádisi bolyp qala berýde jáne patsıentterge tolyqqandy ómir súrýge múmkindik beredi. Biraq eń mańyzdysy — qaıtys bolǵannan keıingi donorlyq júıesine qoǵamnyń senimin qalyptastyrý, — dep atap ótti Densaýlyq saqtaý mınıstri Aqmaral Álnazarova óziniń quttyqtaý sózinde.
Búginde Qazaqstanda 4300-den astam adam, onyń ishinde 121 bala aǵza transplantatsııasyn kútip otyr. Árbir donor jeti adamnyń ómirin saqtaı alady, sondyqtan donorlyq mádenıetti damytý qoǵam úshin mańyzdy mindetke aınalady.
2012 jyly elimizde alǵashqy júrek transplantatsııasy jasalǵannan beri qazaqstandyq dárigerler baýyr, búırek, júrek, móldir qabyq, al 2015 jyldan bastap ókpe transplantatsııasyn da meńgerdi.
— Jaqyn arada balalarǵa júrek pen baýyr transplantatsııasyn júrgizý, sondaı-aq aǵza keshenderin transplantattaý josparlanǵan.
Orta eseppen jyl saıyn 200–300 patsıentke aǵza transplantatsııasy jasalady. Ómir súrý kórsetkishteri álemniń jetekshi klınıkalarynyń nátıjelerimen salystyrylady: búırek retsıpıentterinde — 95–97%, baýyr retsıpıentterinde — 85%, júrek retsıpıentterinde — 86%.
Jumysty úılestirý úshin barlyq óńirindegi ókildikteri bar Respýblıkalyq transplanttaýdy úılestirý ortalyǵy quryldy, — delingen mınısrlik habarlamasynda.
Densaýlyq saqtaý júıesinde tsıfrlandyrý belsendi damýda: donorlar men retsıpıentterdi esepke alýdyń aqparattyq júıesi engizildi, ol derekterdi avtomatty túrde salystyrady jáne «kútý paraǵyndaǵy» patsıentter úshin aǵzalardy irikteıdi.
Sonymen qatar, zańnama jetildirilýde: «Halyq densaýlyǵy jáne densaýlyq saqtaý júıesi týraly» Kodekske jáne zańǵa táýeldi aktilerge qajetti ózgerister engizildi.
Alaıda aǵza donorlyǵynyń jetispeýshiligi áli de negizgi másele bolyp otyr. Qazaqstanda qaıtys bolǵannan keıingi donorlyq deńgeıi tómen kúıinde qalyp otyr, al bul túıtkildi tek birlesken kúsh-jiger arqyly ǵana sheshý múmkin.
Sarapshylardyń aıtýynsha, sheshýshi ról qoǵamǵa tıesili. Sondyqtan donorlyq júıege degen senimdi kúsheıtý, onyń etıkalyq negizderin túsindirý jáne qalyptasqan mıfterdi seıiltý erekshe mańyzdy.
Bul úderiste qarapaıym shyndyqty jetkize alatyn dárigerlerge, dinı qyzmetkerlerge, áleýmettanýshylarǵa, psıhologtarǵa jáne buqaralyq aqparat quraldaryna erekshe mıssııa júkteledi: bir ǵana sheshim birneshe adamnyń ómirin qutqaryp qalýy múmkin.
Aıta ketelik 2030 jylǵa qaraı týberkýlezdi túbegeıli joıý týraly qarar qabyldanǵan edi.