Elde 400-ge jýyq densaýlyq saqtaý sýbektisi qyzmetin toqtatty
ASTANA. KAZINFORM — Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti jeke medıtsınalyq uıymdardy tekserýlerdi kúsheıtedi.
2025 jyly júrgizilgen keshendi tekserýlerdiń qorytyndysy boıynsha Qazaqstanda 400-ge jýyq densaýlyq saqtaý sýbektisi qyzmetin toqtatty.
Tekserý barysynda 500-den astam ákimshilik jaza qoldanyldy, salynǵan aıyppuldardyń somasy 70 mln teńgeden asty.
Qadaǵalaý praktıkasynda alǵash ret medıtsınalyq uıymdardyń qyzmetin ýaqytsha toqtata turýdy jáne lıtsenzııasyz qyzmettiń anyqtalǵan faktileri men biliktilik talaptaryna sáıkes kelmegeni úshin medıtsına qyzmetkerlerin shettetýdi qosa alǵanda, jedel den qoıý sharalary qoldanyldy.
Jeke emdeý bólmelerine, narkologııalyq ońaltý ortalyqtaryna jáne stomatologııalyq klınıkalarǵa nazar aýdaryldy. Tekserý nátıjeleri lıtsenzııasyz jumys isteýdi jáne medıtsınalyq kómek kórsetý standarttaryn saqtamaýdy qosa alǵanda, júıeli zań buzýdy kórsetti.
— Keshendi tekserý barysynda elimiz boıynsha 1900-den astam jumys istep turǵan jeke rásimdik kabınetter anyqtaldy, onyń ishinde 406 nysan (20,5%) medıtsınalyq qyzmetti lıtsenzııasyz júzege asyrdy. Tekserý jáne túsindirý jumystarynyń qorytyndysy boıynsha 247 emshara kabıneti óz erkimen qyzmetin toqtatty, — delingen DSM habarlamasynda.
Jeke narkologııalyq jáne ońaltý ortalyqtary boıynsha 39 tekserý júrgizildi, lıtsenzııanyń bolmaýy 14 jaǵdaıda anyqtaldy (36%).
Stomatologııalyq klınıkalarǵa qatysty 313 nysan tekserildi, túsindirý jumystarynyń qorytyndysy boıynsha 143 klınıka óz erkimen jumysyn toqtatty.
Bul rette tekserý barysynda anyqtalǵan eń jıi buzýshylyqtar:
— lıtsenzııasyz qyzmet — 3,9 mln teńge somasyna 179 hattama jasaldy;
— farmatsevtıkalyq qyzmet qaǵıdalaryn buzý-19,5 mln teńge somasyna 85 hattama.
Sondaı-aq biliktilik talaptaryna sáıkes kelmeý boıynsha (82 hattama), medıtsınalyq kómek standarttaryn óreskel buzý boıynsha (73 hattama) jáne tirkelmegen dári-dármekter men medıtsınalyq buıymdardy qoldaný boıynsha (16 hattama) zań buzý anyqtaldy.
Mınıstrlik 2026 jyly TMKKK jáne MÁMS sheńberinde keshendi tekserýlerdi qosa alǵanda, jeke medıtsınalyq uıymdarǵa baqylaýdy kúsheıtýdi, standarttarǵa sáıkestikti qaıta baǵalaı otyryp, lıtsenzııalardyń qoldanylý merziminiń 5 jyldyǵyn engizýdi, lıtsenzııadan keıingi baqylaýdy tsıfrlandyrýdy jáne jasandy ıntellekt elementteri bar qaýipterdi basqarý júıesin iske qosýdy josparlap otyrǵanyn aıta ketken jón.
Osyǵan baılanysty, Qazaqstan azamattaryna medıtsınalyq kómek alǵan kezde medıtsınalyq uıymda lıtsenzııanyń bar-joǵyn jáne personaldyń biliktiligin tekserý usynylady.
Zań buzý anyqtalǵan jaǵdaıda Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń aýmaqtyq departamentterine E-otinish júıesi arqyly ótinish jiberý qajet.
Aıta ketelik elde 400-den astam jańa dári-dármek óndiriledi.