Elde 400-den astam jańa dári-dármek óndiriledi
ASTANA. KAZINFORM – Úkimet Qazaqstanda 400-den astam jańa dári-dármek óndirý týraly kelisimdi maquldady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov ótkizgen QR Prezıdenti janyndaǵy Sheteldik ınvestorlar keńesiniń aralyq otyrysynda densaýlyq saqtaý mınıstri Aqmaral Álnazarova azamattardyń dári-dármekke qoljetimdiligin qamtamasyz etý boıynsha júrgizilip jatqan jumystar týraly baıandady.
Onyń aıtýynsha, uzaqmerzimdi demografııalyq boljamdary men elimizdiń 10-15 jyl ishindegi dárilik zattarǵa qajettiligin eskere otyryp, ınvestıtsııalar tartý tetikterin jetildirý boıynsha ınvestorlarmen birlesip jumys júrgizildi. Nátıjesinde jańa qural – salyqtyq jáne kedendik jeńildikterdi, ınfraqurylymdyq qoldaýdy ǵana emes, sonymen qatar ónimdi ótkizýdiń uzaqmerzimdi kepildikterin kózdeıtin ınvestıtsııalar týraly kelisimder engizildi.
Búginde Úkimet otyrysynda jalpy quny $620 mln nemese 316 mlrd teńge bolatyn 6 ınvestıtsııalyq joba maquldandy.
Bul, eń aldymen, jalpy Qazaqstannyń dárimen qamtý isindegi derbestigi máselesi. Aldaǵy 2-4 jylda elimizde 400-den astam jańa dárilik zattar óndiriledi, — dedi Aqmaral Álnazarova.
Sońǵy eki jylda farmatsevtıka salasyna tartylǵan ınvestıtsııa kólemi eki esege – $47 mln-nan $87 mln-ǵa deıin artqany atap ótildi. Jańa jobalar sheńberinde 1 myńnan astam jumys ornyn ashý kózdelgen.
Jalpy, farmatsevtıkalyq jáne medıtsınalyq ónerkásipti damytýdyń 2030 jylǵa deıingi tujyrymdamasy sheńberinde odan ári jumys júrgiziledi. Elimizde farmatsevtıka salasy úshin mamandar daıarlaýdyń tolyq júıesi jumys isteıdi, onyń ishinde memlekettik qoldaý, dýaldy bilim berýdi damytýǵa basa nazar aýdarylady.
Sondaı-aq 1 qańtardan bastap TMKKK jáne MÁMS sheńberinde dári-dármekter men medıtsınalyq qyzmetterdi ımporttaý jáne ótkizý QQS-tan bosatyldy. Jalǵan preparattardyń aınalymyna baqylaý men jaýapkershilikti kúsheıtý boıynsha túzetýler daıyndaldy.
Aıta ketelik farmkompanııalar dári-dármekterdiń túpnusqalyǵyn baqylaýdy kúsheıtedi.