Elde eń kóp suranysqa ıe donorlyq aǵza belgili boldy

13 tamyzda Dúnıejúzilik donorlyq kúni atap ótiledi. Bul kún ómirlik mańyzy bar transplantattaýdy kútip júrgen adamdardy eske salyp, olarǵa ómir súrýge múmkindik beretin donorlyqtyń mańyzdylyǵyna nazar aýdarady. Búginde Qazaqstanda aǵza transplantattaýyn 4 739 adam kútip júr, onyń ishinde 125 bala bar. Sonymen qatar elimizde transplantattaý sany artyp, qaıtys bolǵannan keıingi donorlyq júıesi damyp keledi.

— Kútý paraǵyndaǵy patsıentterdiń basym bóligine búırek transplantattaý qajet — 4 208 adam. Baýyr transplantattaýyn — 293, júrek transplantattaýyn — 208, ókpe transplantattaýyn 30 patsıent kezekte.

Sońǵy jyldary Qazaqstanda transplantattaý sany artty. 2023 jyly 236 operatsııa jasalsa, 2024 jyly — 260, 2025 jyly — 310 operatsııa júrgizildi. 2026 jyldyń alǵashqy jartyjyldyǵynda taǵy 150 transplantattaý jasaldy, onyń 30-y qaıtys bolǵan donorlardan alynǵan aǵzalar arqyly oryndaldy, — delingen DSM habarlamasynda.

Qaıtys bolǵannan keıingi áleýetti donorlardyń sany artyp keledi

— Qaıtys bolǵannan keıingi donorlyqty damytý baǵytynda da oń dınamıka baıqalady. Eger 2023 jyly 49 áleýetti donor anyqtalsa, 2024 jyly — 86, al 2025 jyly olardyń sany 186-ǵa jetti. 2026 jyldyń alǵashqy jartyjyldyǵynda taǵy 108 áleýetti donor anyqtaldy. Segiz jaǵdaıda mýltıaǵzalyq alý júrgizildi, ıaǵnı bir donordyń aǵzalary birneshe patsıentke kómek kórsetýge múmkindik beredi, — delingen habarlamada

Bul rette áleýetti donor — aǵzalary avtomatty túrde alynatyn adam emes.

Áńgime dárigerler konsılıýmy belgilengen tártippen mı ólimin anyqtaǵan jáne donorlyqqa qoıylatyn medıtsınalyq ólshemsharttarǵa sáıkes keletin patsıent týraly bolyp otyr. Osydan keıin adamnyń kózi tirisindegi erik bildirýi tekserilip, zańnamada kózdelgen barlyq rásim júrgiziledi.

Búginde Qazaqstan azamattary qaıtys bolǵannan keıingi donorlyqqa qatysty óz sheshimin aldyn ala eGov arqyly tirkeı alady.

— Qazirgi tańda mundaı tańdaýdy 172 283 adam jasady. Onyń ishinde 16 109 adam qaıtys bolǵannan keıingi donorlyqqa kelisimin bildirse, 156 174 adam bas tartqan, — delingen mınıstrlik habarlamasynda.

Qaıtys bolǵannan keıingi donorlyq týraly sheshim — adamnyń jeke ári erikti tańdaýy. Densaýlyq saqtaý júıesiniń mindeti — azamatqa durys sheshim qabyldaýy úshin shynaıy ári túsinikti aqparat usyný.

Donorlyqqa arnalǵan bastamalar medıtsına mamandaryn ǵana emes, patsıentterdi, olardyń otbasylaryn, qoǵamdyq uıymdardy jáne myńdaǵan beıjaı qaramaıtyn azamattardy biriktirip keledi.

Máselen, 9 tamyzda Astanada «Heart Center Foundation» qoǵamdyq qory uıymdastyrǵan jyl saıynǵy Jüregımnıñ Jeñımpazy qaıyrymdylyq júgiris-festıvali ótti. Іs-sharaǵa shamamen 7 myń adam qatysty. Qazaqstan Respýblıkasy Densaýlyq saqtaý mınıstrliginiń Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy dástúrli túrde is-sharanyń áriptesi boldy.

Mundaı bastamalar donorlyq týraly qarapaıym ári túsinikti tilde — adam ómiriniń qundylyǵy, ózara qoldaý jáne transplantattaýǵa muqtaj adamdarǵa kómektesý múmkindigi turǵysynan aıtýǵa múmkindik beredi.

Respýblıkalyq ortalyq transplantattaý qyzmetin damytý, donorlyqty úılestirý júıesin jetildirý, medıtsına mamandaryn daıarlaý jáne halyqtyń habardarlyǵyn arttyrý baǵytyndaǵy jumystardy jalǵastyrýda.

Búginde kútý paraǵynda 4 739 adam tur. Bul sannyń árqaısysynyń artynda naqty patsıent pen otbasy tur. Al donorlyq aǵza olar úshin ómirdi saqtap qalýǵa múmkindik beretin úmit bolýy múmkin.

Eske salsaq donor men retsıpıenttiń sáıkestigin baǵalaıtyn AI qalaı jumys isteıtini týraly jazǵan edik.