Elde 333 myńnan astam adamnyń resmı jumysy joq
ASTANA. KAZINFORM — 2026 jylǵy II toqsanda Qazaqstandaǵy jumyssyzdyq deńgeıi 4,5%-dy qurady. Bul kórsetkish Halyqaralyq eńbek uıymynyń ádistemesi boıynsha eseptelgen.
Ulttyq statıstıka bıýrosynyń derekterine qaraǵanda, bul kezeńde eldegi jumys kúshiniń sany 9 844,5 myń adamǵa jetti. Onyń ishinde 9 399,9 myń adam jumyspen qamtyldy.
Jumyspen qamtylǵandardyń 7 253,2 myńy nemese 77,2%-y jaldamaly qyzmetkerler bolsa, 2 146,7 myń adam nemese 22,8%-y ózin-ózi jumyspen qamtyǵandar.
Byltyrǵy osy kezeńmen salystyrǵanda jumyspen qamtylǵandar sany 99,5 myń adamǵa ósken. Bul ósim negizinen jaldamaly qyzmetkerler sanynyń artýy esebinen bolǵan.
— Jumyspen qamtylǵandardyń basym bóligi saýda salasynda — 16,8%, bilim berýde — 13,3%, ónerkásipte — 12,4% jáne aýyl sharýashylyǵynda — 10,5% shoǵyrlanǵan, — delingen Ulttyq statıstıka bıýrosy taratqan málimette.
Sonymen qatar 15 jáne odan joǵary jastaǵy halyqqa shaqqandaǵy jumyspen qamtý deńgeıi — 64,3%.
15-34 jastaǵy jastar arasyndaǵy jumyssyzdyq deńgeıi 2,9% boldy. Al jumys istemeıtin, bilim alýmen nemese kásibı daıarlyqpen aınalyspaıtyn NEET jastarynyń úlesi 5,7% boldy.
Maýsym aıynyń sońynda Qazaqstannyń jumyspen qamtý organdarynda 333,1 myń jumyssyz resmı tirkelgen. Tirkelgen jumyssyzdardyń úlesi jumys kúshiniń 3,4%-y bolady.
Eske salaıyq, buǵan deıin Úkimette jumyssyzdar men NEET jastaryn jumyspen qamtý máselesi qaralǵanyn jazǵanbyz.
