Elde 33 mln tonnadan astam jemshóp daıyn: qaı oblys kósh basynda
ASTANA. KAZINFORM — Elimizdiń óńirlerinde jemshóp daıyndaý naýqany jalǵasyp jatyr. Oblys ákimdikteriniń jedel derekterine sáıkes, búgingi tańda aldaǵy qysqy kezeńge qajetti jemshóptiń 33,1 mln tonnasy daıyndaldy, dep habarlaıdy AShM baspasóz qyzmeti.
Bul josparlanǵan kólemniń 80%-yn quraıdy. Atap aıtqanda, 25,3 mln tonna shóp, 2,5 mln tonna saban, 2,3 mln tonna pishendeme, 1,6 mln tonna qunarlandyrylǵan jem jáne 1,4 mln tonna súrlem ázirlendi.
— Jemshóp daıyndaý kólemi boıynsha Túrkistan oblysy kósh bastap tur. Munda 5,02 mln tonna jemshóp ázirlendi. Odan keıin Jambyl oblysy – 3,25 mln tonna, Almaty oblysy – 3,11 mln tonna, Batys Qazaqstan oblysy – 2,58 mln tonna jáne Soltústik Qazaqstan oblysy – 2,43 mln tonna kórsetkishke qol jetkizdi, — delingen habarlamada.
Qysqy qorada ustaý kezeńin oıdaǵydaı ótkizý jáne saqtandyrý qorlaryn qalyptastyrý maqsatynda «Azyq-túlik kelisimshart korporatsııasy» aktsıonerlik qoǵamy 201,3 myń tonna astyq kóleminde jemdik qor qalyptastyrdy. Qajet bolǵan jaǵdaıda atalǵan rezerv aýyl sharýashylyǵy taýaryn óndirýshilerin qajetti jemshóp resýrstarymen qamtamasyz etý úshin paıdalanylatyn bolady.
Qazirgi ýaqytta jemshóp daıyndaý jumystary elimizdiń barlyq óńirinde jalǵasyp jatyr.
Aýyl sharýashylyǵy mınıstrligi óńirlerdiń ákimdikterimen birlesip, jemshóp daıyndaý naýqanynyń barysyn turaqty baqylaýda ustap otyr. Júrgizilip jatqan monıtorıng pen rezervterdi ýaqtyly qalyptastyrý mal sharýashylyǵy sýbektilerin qajetti jemshóp qorymen qamtamasyz etýge jáne aldaǵy qysqy qorada ustaý kezeńin ońtaıly ótkizýge baǵyttalǵan.
Buǵan deıin Pavlodar óńirinde jemshóp qanshadan satylyp jatqanyn jazǵanbyz.
