Elde 32 myńnan asa nysan múgedektigi bar adamdar úshin qoljetimdi
ASTANA. KAZINFORM — Nysandardy beıimdeý kezinde múgedektigi bar adamnyń ǵımaratqa óz betinshe ári qaýipsiz kirip, onyń ishinde erkin júrip-turýyna jáne qajetti qyzmetterdi alýyna jaǵdaı jasaýǵa basa mán beriledi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Vedomstvo múgedektigi bar adamdar úshin qoljetimdi ári kedergisiz orta qalyptastyrý baǵytyndaǵy júıeli jumysty jalǵastyryp keledi. 2026 jyldyń sońyna deıin elimizde áleýmettik ınfraqurylymnyń 34 573 nysanyn beıimdeý josparlanǵan. Bıylǵy 1 qyrkúıektegi jaǵdaı boıynsha onyń 32 802-si beıimdeldi.
Mundaı nysandardyń qatarynda bilim berý jáne densaýlyq saqtaý uıymdary, mádenıet mekemeleri, memlekettik organdar men uıymdar, sondaı-aq saýda jáne qyzmet kórsetý nysandary bar.
Bul jumys elimizdiń barlyq óńirinde 2025-2030 jyldarǵa arnalǵan Qazaqstan Respýblıkasynyń ınklıýzıvti saıasaty tujyrymdamasy, Jol kartasy men Memleket basshysynyń tapsyrmasy boıynsha iske asyrylyp jatqan «Halyqpen birge» jobasy aıasynda júrgiziledi.
Nysandardy beıimdeý kezinde múgedektigi bar adamnyń ǵımaratqa óz betinshe ári qaýipsiz kirip, onyń ishinde erkin júrip-turýyna jáne qajetti qyzmetterdi alýyna jaǵdaı jasaýǵa basa mán beriledi.
— Adamnyń nysanǵa kelgen sátinen bastap qyzmet alǵanǵa deıingi barlyq joly baǵalanady, ıaǵnı ǵımaratqa irgeles aýmaqtan jáne kireberisten bastap, qyzmet kórsetiletin orynǵa deıingi jaǵdaı qaralady. Sonymen qatar ǵımarat ishindegi júrip-turý joldary, sanıtarııalyq-turmystyq bólmeler, aqparattandyrý jáne telekommýnıkatsııa quraldary tekseriledi. Osylaısha nysannyń qoljetimdiligi onda belgili bir elementtiń bar-joǵyna emes, adamnyń sol nysannyń qyzmetterin óz betinshe jáne esh kedergisiz paıdalana alýyna baılanysty anyqtalady, — delingen habarlamada.
Halyqty aqparattandyrý men qoǵamdyq baqylaýdyń mańyzdy quraldarynyń biri — «Qoljetimdiliktiń ınteraktıvti kartasy». Onda áleýmettik jáne kólik ınfraqurylymy nysandarynyń qoljetimdiligi týraly aqparat ornalastyrylady.
Beıimdeý jumystary jergilikti atqarýshy organdardyń memlekettik mekemelermen jáne bıznes ókilderimen birlesip júrgiziledi. Osy rette qoljetimdilikke qoıylatyn zamanaýı talaptarmen qatar azamattardyń ótinishteri men naqty qajettilikteri de nazarǵa alynady.
Eńbek mınıstrliginde atap ótkendeı, kedergisiz orta qalyptastyrý ǵımarattardy beıimdeýdi jáne múgedektigi bar adamdarǵa qajetti jaǵdaı jasaýdy qamtıtyn keshendi jumysty talap etedi.
Buǵan deıin Astanada múgedektikti anyqtaý protsesi qalaı júrgiziletinin jazǵanbyz.
