Elde 292 myńnan astam adamǵa ataýly áleýmettik kómek kórsetildi

ASTANA. KAZINFORM — 2025 jyly ataýly áleýmettik kómek (budan ári — AÁK) 54,4 myń otbasyndaǵy 292,7 myń adamǵa 33,4 mlrd teńge somasynda taǵaıyndaldy, dep habarlaıdy Eńbekmıni baspasóz qyzmeti.

Buryn habarlanǵandaı, AÁK-tiń negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.

AÁK mynalardy kózdeıdi:

— tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;

— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. 2025 jyly AÁK alýshylar qatarynan mektep jasyna deıingi 91,1 myń balaǵa 4,1 mlrd teńge somasyna qosymsha tólem taǵaıyndaldy;

— jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.

AÁK taǵaıyndaýǵa ótinishti qazaqstandyqtar turǵylyqty jeri boıynsha mansap ortalyǵynda, aýyl okrýginiń ákimine sondaı-aq elektrondyq úkimet portaly (egov.kz) arqyly bere alady.

Buǵan deıin byltyr 276 myńnan astam adam ótinish berýsiz járdemaqy alý múmkindigin paıdalanǵanyn jazdyq.