Elde 25 tamyzdan bastap samokat júrgizýdiń jańa erejeleri kúshine enedi
ASTANA. KAZINFORM — Astanalyqtarǵa elektrosamokatpen júrýdiń jańa erejeleri túsindirildi, dep habarlaıdy qala ákimdiginiń resmı saıty.
Elordalyq Polıtsııa departamenti Astanada elektrosamokat qoldanýshylaryna zańnamadaǵy jańa talaptardy túsindirýge baǵyttalǵan profılaktıkalyq aktsııa uıymdastyrdy. Іs-shara jol qozǵalysy qaýipsizdigin arttyrýǵa jáne jeke mobıldilik quraldaryn jaýapkershilikpen paıdalaný mádenıetin qalyptastyrýǵa baǵyttaldy.
Aktsııaǵa qala turǵyndary, Polıtsııa departamentiniń, prokýratýranyń, kıksherıng kompanııalarynyń, Aýmaqtardyń turaqty damýy qaýymdastyǵynyń ókilderi, sondaı-aq «Astana Jastary» jastar resýrstyq ortalyǵynyń volonterleri qatysty.
Jol qozǵalysyna qatysýshylarǵa elektrosamokattardy paıdalaný erejelerindegi ózgerister túsindirilip, olardyń suraqtaryna jaýap berildi jáne Jol qozǵalysy erejelerin saqtaý qajettigi eskertildi.
«Astana Jastary» volonterleri qatysýshylarǵa elektrosamokattardy qaýipsiz paıdalaný erejeleri jazylǵan aqparattyq broshıýralar da taratty.
Negizgi nazar 2026 jylǵy 25 tamyzdan bastap kúshine enetin talaptarǵa aýdaryldy. Atap aıtqanda, elektrosamokattardyń trotýarlar men jaıaý júrginshiler joldarymen júrýine tyıym salynady. Paıdalanýshylar velosıped joldary men velojolaqtarmen júrýi tıis. Olar bolmaǵan jaǵdaıda Jol qozǵalysy erejelerinde kózdelgen jaǵdaılarda júris bóliginiń oń jaq shetimen nemese jol jıegimen júrý qajet.
— Elektrosamokattar áldeqashan jol qozǵalysynyń tolyqqandy qatysýshylaryna aınaldy. Alaıda paıdalanýshylardyń belgilengen talaptardy saqtamaýy jeke mobıldilik quraldaryn júrgizýshilerdiń ózderine de, jol qozǵalysynyń basqa qatysýshylaryna da qaýip tóndiredi, — dedi Astana Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev.
Onyń aıtýynsha, Jol qozǵalysy erejelerine engizilgen ózgerister qaýipsizdikti arttyrýǵa jáne jol-kólik oqıǵalarynyń sanyn azaıtýǵa baǵyttalǵan.
Júris bóligimen qozǵalǵan kezde elektrosamokat júrgizýshisi 18 jasqa tolǵan bolýy, kez kelgen sanattaǵy júrgizýshi kýáligi bolýy jáne qorǵanys shlemin paıdalanýy tıis. Qarańǵy ýaqytta jaryq shaǵylystyratyn elementterdi de qoldaný qajet.
Astana prokýratýrasynyń qyzmetkerleri elektrosamokat paıdalanýshylar arasynda jıi kezdesetin quqyq buzýshylyqtardyń qatarynda júrgizýshi kýáliginsiz júris bóligine shyǵý, jyldamdyqty asyrý, sondaı-aq qıylystardan ótý talaptaryn saqtamaý bar ekenin atap ótti. Bir samokatpen jolaýshy tasymaldaý da erekshe qaýip tóndiredi.
— Búginde samokat júrgizýshileri kóbine júris bóliginde ereje buzady. Kýáligi joq azamattardyń joldyń jekelegen ýchaskelerinde samokat júrgizý faktileri áli de kezdesedi. Budan bólek, trotýarlarda jyldamdyqty jıi asyrady, bul jol-kólik oqıǵalary bolý qaýpin arttyrady, — dedi Astana qalasy prokýratýrasy basqarmasynyń prokýrory Aqjol Sátilda.
Ol zańnamadaǵy ózgeristerdiń jol qozǵalysyna qatysýshylardyń qaýipsizdigin arttyrý qajettiligimen de baılanysty ekenin atap ótti.
Kıksherıng kompanııalarynyń ókilderi paıdalanýshylardy baqylaý úshin qabyldanyp jatqan sharalar týraly aıtyp berdi. JET kompanııasy elordalyq fılıalynyń dırektory Álibek Ábilqasovtyń aıtýynsha, 1 shildeden bastap qosymshaǵa tirkelý kezinde JSN boıynsha mindetti verıfıkatsııa júrgiziledi. Júıe paıdalanýshynyń jasyn tekseredi jáne 18 jasqa tolmaǵan adamdardyń servıske kirýine múmkindik bermeıdi.
— Biz ata-analardyń óz akkaýnttaryn balalaryna bergen jaǵdaılaryn anyqtadyq. Mundaı akkaýnttar buǵattalady. Sondaı-aq bir samokat — bir adam ekenin este ustaǵan jón. Eki adam bolyp júretin paıdalanýshylardyń akkaýnttary da buǵattalady, — dedi Álibek Ábilqasov.
Onyń aıtýynsha, 1 shildeden bastap samokattarǵa úsh jaǵynan — jaqtaýyna jáne artqy qanatyna sáıkestendirý nómirleri jazyla bastady. Bul kólik quralyn kameralar arqyly anyqtaýǵa jáne quqyq buzýshylarǵa qatysty shara qabyldaýǵa múmkindik beredi.
Kompanııa ókilderi turaqqa qoıý mádenıetine de erekshe nazar aýdardy. Elektrosamokattardy trotýardyń ortasyna, júris bóligine, velojolǵa nemese avtokólikterge arnalǵan turaq oryndaryna qaldyrýǵa bolmaıdy. Mundaı talaptardy buzǵan paıdalanýshylarǵa da jaza qoldanylýy nemese akkaýnty buǵattalýy múmkin.
Uıymdastyrýshylardyń aıtýynsha, mundaı is-sharalar jeke mobıldilik quraldaryn paıdalanýshylardyń quqyqtyq saýattylyǵyn arttyrýǵa, jol-kólik oqıǵalarynyń sanyn azaıtýǵa jáne qaýipsiz qalalyq orta qalyptastyrýǵa baǵyttalǵan.
Osyǵan deıin Almatyda elektr samokattary men mopedterdi paıdalaný tártibi ózgeretinin jazǵanbyz.
