Elde 2100-den astam áleýmettik joba júzege asyrylyp jatyr
ASTANA.KAZINFORM – 2025 jyldyń alǵashqy jartyjyldyǵynda Qazaqstanda memlekettik áleýmettik tapsyrys salasynda belsendilik artyp keledi. Qazirgi tańda elimiz boıynsha jalpy somasy 33,1 mlrd teńge bolatyn 2105 áleýmettik joba iske asyrylyp jatyr.
Bul bastamalar ınklıýzıvti qoǵam qurýǵa, áleýmettik osal toptardy qoldaýǵa jáne aýyldyq óńirlerdi qosa alǵanda, azamattardyń quqyqtyq saýatyn arttyrýǵa baǵyttalǵan.
— 1 shildeden bastap memlekettik granttardy berý jáne monıtorıng júrgizý qaǵıdalarynyń jańartylǵan redaktsııasy kúshine endi. Jańa tásilder rásimderdi jeńildetip, ashyqtyqty arttyryp, úkimettik emes uıymdarǵa jobalardyń mazmunyna nazar aýdarýǵa múmkindik berdi. Nátıjesinde úkimettik emes uıymdardan túsken ótinimder sany 7,7% artty, al bir grantqa keletin báseke 16,9 ótinimge deıin jetti. Bul azamattyq sektordyń memlekettik qoldaý tetikterine seniminiń joǵary ekenin kórsetedi. Granttyq qarjylandyrý naqty áleýmettik nátıje kórsetýde. Jyl saıyn múmkindigi shekteýli tulǵalardyń jumysqa ornalasýyna jaǵdaı jasalýda. Túrli maqsatty toptarǵa arnalǵan 500-den astam oqytý is-sharasy ótkiziledi. 3000-ǵa jýyq azamat eńbek naryǵynda suranysqa ıe daǵdylardy meńgerip jatyr, — delingen Mádenıet jáne aqparat mınıstrliginiń baspasóz qyzmeti habarlamasynda.
Memleket pen úkimettik emes sektor arasyndaǵy áriptestikti nyǵaıtý maqsatynda Jetisý, Jambyl, Aqmola jáne Soltústik Qazaqstan oblystarynda forýmdar ótkizildi. Oǵan myńnan astam úkimettik emes uıym ókilderi qatysty. Kezdesýlerdiń qorytyndysy boıynsha júzden astam praktıkalyq usynym ázirlendi. Bul jumystyń qorytyndy kezeńi — XII Respýblıkalyq Azamattyq forýmy, ol qazan aıynda Astana qalasynda ótedi. Forýmǵa azamattyq qoǵam, memlekettik organdar, bıznes jáne halyqaralyq sarapshylar shaqyrylyp, 700-den astam qatysýshy jınalady.
Qoǵamdyq baqylaýdy damytýda Qoǵamdyq keńester mańyzdy ról atqarady. Búginde elimizde 264 qoǵamdyq keńes qyzmet atqarady, onyń 36-sy respýblıkalyq deńgeıde. Keńes quramyna 4 myńǵa jýyq belsendi azamat engen. Bıylǵy jartyjyldyqta qoǵamdyq keńester 1500-den astam normatıvtik quqyqtyq akt jobasyn qarap, 200-den astam qoǵamdyq tyńdaý jáne 300-ge jýyq monıtorıng júrgizdi.
Sondaı-aq, qoǵamdyq keńester «Taza Qazaqstan» respýblıkalyq ekologııalyq aktsııasyn qoldap, óńirlerde 65-ten astam is-shara ótkizdi. Bul tekseristerge týrıstik nysandar, jasyl aımaqtar, jer qoınaýyn paıdalaný oryndary men ruqsatsyz qoqys tastaıtyn oryndar qamtyldy.
Qoǵamdyq keńesterdiń jumysy aqparattyq súıemeldeý KAZKENES.KZ biryńǵaı ınternet-platformasy arqyly júrgizilip jatyr. 2025 jyldyń alǵashqy jartyjyldyǵynda saıtty 1,5 mıllıonǵa jýyq adam paıdalanǵan. Platforma azamattyq qoǵammen ashyq dıalog ornatýda mańyzdy quralǵa aınaldy.
Memlekettik áleýmettik tapsyrysty jáne qoǵamdyq baqylaý ınstıtýtyn damytý Qazaqstannyń úkimettik emes uıymdardy qoldaýǵa jáne azamattardyń sheshim qabyldaý protsesine qatysýǵa baǵyttalǵan strategııalyq ustanymyn aıqyndaıdy.
Aıta ketelik JOO-larda kapıtaly 50 mlrd teńge bolatyn 5 endaýment qor qurylady.