Elde 2030 jylǵa deıin jańa gaz óńdeý zaýyttary iske qosylady
ASTANA. KAZINFORM — Іshki tutynýǵa arnalǵan taýarlyq gaz óndirý kólemi 29,6%-ǵa artady, ıaǵnı 2025 jylǵy 27,4 mlrd tekshe metrden 2032 jylǵa qaraı 35,5 mlrd tekshe metrge deıin ulǵaıady. Bul týraly Úkimet otyrysynda energetıka mınıstri Erlan Aqkenjenov málimdedi.
— Ósim Qashaǵan men Qarashyǵanaqta qaıta óńdeý qýattaryn iske qosý esebinen qamtamasyz etiledi, bul ınfraqurylymdy keńeıtýge jáne óńirlerdi gazben turaqty jabdyqtaýǵa kepildik beredi. 2027-2030 jyldary taýarlyq gazdyń qosymsha kólemi 1,6 mlrd tekshe metrge, 2031 jyly — 2,3 mlrd tekshe metrge, al 2032 jyly 6,6 mlrd tekshe metrge jetedi, — dedi E. Aqkenjenov.
Mınıstrdiń aıtýynsha, basym mindetterdiń biri — ınfraqurylymdyq nysandardy ýaqytyly iske qosý bolyp qala beredi. 2025 jyly qazan aıynda «Taldyqorǵan — Úsharal» magıstraldyq gaz qubyry paıdalanýǵa berildi.
Budan basqa, osy jyldyń sońynda «Beıneý-Bozoı-Shymkent» gaz qubyrynyń ekinshi jelisine qarasty jelilik bóliginiń birinshi kezeńin, al 2029 jyly onyń ekinshi kezeńin aıaqtaý josparlanýda, bul taýarlyq gazdyń qýatyn jylyna 15 mlrd tekshe metrge deıin arttyrady.
— 2027 jyly Qashaǵanda qýaty jylyna 1 mlrd tekshe metr bolatyn gaz óńdeý zaýyty jáne Jańaózende qýaty jylyna 0,9 mlrd tekshe metr bolatyn Qazaq gaz óńdeý zaýyty paıdalanýǵa beriledi. 2030 jylǵa qaraı Qashaǵanda jylyna 2,5 mlrd tekshe metr gaz óńdeıtin GÓZ, sondaı-aq Qarashyǵanaqta jylyna 5 mlrd tekshe metr ónim shyǵaratyn GÓZ iske qosý kózdelgen. Osy jobalardy júzege asyrý gazdy qaıta óńdeýdi ulǵaıtýǵa, gaz tasymaldaý ınfraqurylymyn keńeıtýge jáne óńirlerdi turaqty gazben jabdyqtaýǵa múmkindik beredi, — dedi Erlan Aqkenjenov.
Aıta keteıik, Qazaqstanda gazdandyrý deńgeıi 64,2% jetkeni belgili boldy. Taýarlyq gazdyń resýrstyq bazasyn ulǵaıtý maqsatynda jańa ken oryndaryn ıgerý josparlanyp otyr.
2035 jylǵa qaraı qazaqstandyqtardyń 80 paıyzy tabıǵı gazǵa qol jetkizedi.
