Elde 17 myń shaqyrym elektr jelisi jańartylady
ASTANA. KAZINFORM — Qazaqstanda 17 myń km elektr jelileri men 444 joǵary kerneýli qosalqy stantsııa jańartylady. Bul týraly Energetıka mınıstrligi habarlady.
Energetıka mınıstrliginiń Memlekettik energetıkalyq qadaǵalaý jáne baqylaý komıtetinde óńirlik elektr jelilik kompanııalarynyń jáne «KEGOC» AQ magıstraldyq elektr jelileri fılıaldarynyń basshylaryn tyńdaý otyrystary ótkizildi.
Tyńdaý barysynda aǵymdaǵy jylytý maýsymynyń ótýi, energetıkalyq kásiporyndardyń sý tasqyny kezeńine daıyndyǵy, aldaǵy jóndeý naýqanyn ótkizý josparlary jáne kelesi jylytý maýsymyna daıyndyq máseleleri qaraldy.
Energetıkalyq uıymdardyń basshylary elektr jelilik keshen nysandarynyń qazirgi jaǵdaıy, sý tasqyny kezeńine daıyndyqty qamtamasyz etý boıynsha qabyldanyp jatqan sharalar jáne josparlanǵan jóndeý jumystary týraly baıandady.
Kapıtaldyq jóndeý jumystaryn oryndaý, ınvestıtsııalyq baǵdarlamalardy iske asyrý, sondaı-aq «Energetıkalyq jáne kommýnaldyq sektorlardy jańǵyrtý» ulttyq jobasy aıasyndaǵy is-sharalardy oryndaý máselelerine erekshe nazar aýdaryldy.
Bıyl eldiń elektr jelilik kesheninde 17,1 myń km elektr berý jelilerine, 444 joǵary kerneýli qosalqy stantsııaǵa jáne 3408 taratý transformatorlyq qosalqy stantsııaǵa kúrdeli jóndeý júrgizý josparlanǵan.
Bul is-sharalar tutynýshylardy elektrmen jabdyqtaýdyń senimdiligin arttyrýǵa, tehnologııalyq táýekelderdi tómendetýge jáne kúzgi-qysqy kezeńnen turaqty ótýin qamtamasyz etýge baǵyttalǵan.
— 2025 jyldyń qorytyndysy boıynsha elektr jelileriniń tozý deńgeıiniń tómendeýinde oń dınamıkaǵa qol jetkizildi — 2024 jylǵy 67,03%-dan 2025 jyly 66,17%-ǵa deıin tómendedi. Bul elektr jelilik ınfraqurylymdy jańartý men jańǵyrtý boıynsha júıeli jumystar júrgizilip jatqanyn kórsetedi, — delingen mınıstrlik habarlamasynda.
Energetıkalyq kásiporyndarǵa aldaǵy sý tasqyny kezeńine baılanysty normatıvtik avarııalyq materıaldar qoryna revızııa júrgizý, jóndeý jumystaryn ýaqtyly ári sapaly oryndaý, elektr jelilik keshen nysandaryn jańǵyrtý jónindegi is-sharalardy iske asyrý tapsyryldy.
Aıta ketelik aldaǵy bes jylda aýyldarda 79 myń shaqyrym elektr jelisi jańǵyrtylmaq.