Elde 138 myńnan astam adamǵa ataýly áleýmettik kómek kórsetildi

ASTANA. KAZINFORM — 2026 jylǵy 1 aqpandaǵy jaǵdaı boıynsha ataýly áleýmettik kómek (budan ári — AÁK) 25,8 myń otbasyndaǵy 138,1 myń adamǵa 2,3 mlrd teńge somasynda taǵaıyndaldy, dep habarlaıdy Eńbekmıni baspasóz qyzmeti.

Bıyl bul maqsattarǵa bıýdjetten 62,7 mlrd teńge qarastyrylǵan. Buryn habarlanǵandaı, AÁK-tiń negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.

AÁK mynalardy kózdeıdi:

— tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;

— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. Aǵymdaǵy jyldyń 1 aqpanyna AÁK alýshylar qatarynan mektep jasyna deıingi 42,4 myń balaǵa 270,4 mln. teńge somasyna qosymsha tólem taǵaıyndaldy;

— jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.

— Qazir qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine, sondaı-aq Elektrondyq úkimet portaly (egov.kz) arqyly bere alady, — delingen habarlamada.

Osydan buryn Eńbek mınıstrligi AÁK-ti proaktıvti taǵaıyndaýda JI-ni qoldanatyny aıtyldy.