Elde 127 mlrd teńgeniń alaıaqtyq operatsııasyna tosqaýyl qoıyldy
ASTANA. KAZINFORM — Qazaqstanda antıfrod júıesiniń kómegimen 127 mıllıard teńge kólemindegi alaıaqtyq árekettiń joly kesildi. Bul týraly Almatyda ótken Central Asia Fintech Summit 2026 aıasyndaǵy National Antifraud Awards 2026 marapattaý rásiminde aıtyldy.
Ulttyq Antıfrod-ortalyǵy 2024 jyly Ulttyq tólem korporatsııasynyń janynan qurylyp, bankterdi, tólem jáne mıkroqarjy uıymdaryn, memlekettik organdardy, quqyq qorǵaý qurylymdary men baılanys operatorlaryn bir tsıfrlyq platformaǵa biriktirgen. Qazir júıege 270-ten astam uıym qosylǵan.
Platforma qatysýshylary kúdikti operatsııalar týraly aqparatpen onlaın almasyp, alaıaqtyq áreketterdiń aldyn alýǵa múmkindik alady. 2026 jylǵy 1 qyrkúıektegi málimet boıynsha, osy júıeniń úılesimdi jumysynyń arqasynda 127 mlrd teńgeniń alaıaqtyq operatsııasyna tosqaýyl qoıylǵan.
Marapattaý rásiminde alaıaqtyqpen kúreske úles qosqan polıtsııa departamentteri men qarjy uıymdary úzdik dep tanyldy.
«Jyl qaıtarymy» nomınatsııasynda Túrkistan oblysynyń polıtsııa departamenti jeńimpaz atandy. Atalǵan sanatta Jetisý jáne Qyzylorda oblystarynyń polıtsııa departamentteri de fınalıst boldy.
Al «Senimdi seriktes» nomınatsııasynda Astana polıtsııa departamenti úzdik shyqty. Almaty qalasy men Atyraý oblysynyń polıtsııa departamentteri fınalıst atandy.
Qarjy uıymdary arasynda Freedom Bank «Jyldyń antıfrod-seriktesi» atansa, Kaspi Bank «Senimdi seriktes» nomınatsııasynda jeńimpaz boldy. Halyk Bank qarjylyq qaýipsizdik mádenıetin damytýǵa qosqan úlesi úshin marapattaldy.
Ulttyq Antıfrod-ortalyǵyn damytýǵa qosqan úlesi úshin WhyHappen, Eýrazııalyq bank, Bereke Bank jáne Freedom Bank arnaıy marapattarǵa ıe boldy. Olar alaıaqtyqty anyqtaý men aldyn alýǵa baǵyttalǵan «Sessııalyq antıfrod» pılottyq jobasyna qatysty.
Ulttyq tólem korporatsııasynyń basqarma tóraıymy Janar Samaevanyń aıtýynsha, alaıaqtyqpen tıimdi kúresý úshin ortaq ınfraqurylym, derektermen jedel almasý jáne barlyq taraptyń úılesimdi jumysy qajet.
— Aldaǵy mindet – táýekelderdi erte satyda anyqtap, azamattarǵa materıaldyq zalal keltirilmeı turyp alaıaqtyq operatsııalardyń jolyn kesetin quraldardy damytý. Antifraud Awards marapaty osy iske súbeli úles qosyp júrgenderdiń eńbegin aıshyqtaıdy, — dedi ol.
Eske salaıyq, buǵan deıin Qazaqstanda alaıaqtar ózderin eGov qyzmetkerleri retinde tanystyryp, azamattardy aldaýdyń jańa tásiline kóshkenin jazǵanbyz. Keıingi bir aıda osyndaı 30-ǵa jýyq jaǵdaı tirkelgen.
