Elde 100 temirjol vokzalda qurylys-montaj jumystary aıaqtaldy
ASTANA. KAZINFORM — Búginde 100 nysanda qurylys-montaj jumystary aıaqtaldy. Joba jolaýshylar ınfraqurylymyn keshendi jańartýǵa jáne elimizdiń barlyq óńirinde azamattar úshin zamanaýı, qolaıly ári qaýipsiz jaǵdaı jasaýǵa baǵyttalǵan.
Qazaqstanda Memleket basshysynyń tapsyrmasy boıynsha 124 temirjol vokzalyn rekonstrýktsııalaý jáne qaıta jańǵyrtý jónindegi aýqymdy baǵdarlama júzege asyrylyp jatyr.
Nysandardyń tehnıkalyq jaǵdaıyna qaraı qoldanystaǵy ǵımarattarǵa kúrdeli jóndeý jumystary júrgizilse, keıbir eldi-mekenderde jańa jolaýshylar keshenderi salyndy. Birqatar nysanda ǵımarattardyń aýmaǵy keńeıtilip, kótergish qurylymdary kúsheıtildi, konkorstar salyndy, jolaýshylar platformalary men aıaldaý pavılondary qaıta jańǵyrtyldy.
Qaıta jańǵyrtý aıasynda barlyq nysanda shatyr men qasbetter jańartylyp, káriz, sý, jylý jáne elektrmen jabdyqtaý, baılanys júıeleri aýystyryldy. Sondaı-aq nysandarda ishki árleý jumystary júrgizilip, irgeles aýmaqtar abattandyryldy.
Vokzaldar zamanaýı jıhazdarmen jáne navıgatsııalyq júıelermen, jeldetý jáne aýa baptaý júıelerimen, beınebaqylaý, órt jáne kúzet dabyldarymen, sondaı-aq kirýdi baqylaý júıelerimen jabdyqtalyp jatyr. Qaýipsizdik deńgeıin arttyrý maqsatynda ıntroskoptar men metall izdegishter ornatylyp jatyr.
Erekshe qajettiligi bar jolaýshylar úshin kedergisiz orta qalyptastyrýǵa erekshe kóńil bólinedi. Vokzaldar pandýstarmen, lıftilermen jáne kótergish qurylǵylarmen, taktıldi navıgatsııamen, qyzmetkerlerdi shaqyrý túımelerimen, beıimdelgen sanıtarlyq bólmelermen jáne aqparattyq kórsetkishtermen jabdyqtalýda.
Vokzaldardy rekonstrýktsııalaý jáne qaıta jańǵyrtý jónindegi aýqymdy baǵdarlama jolaýshylarǵa qyzmet kórsetý sapasyn arttyrýǵa, temirjol ınfraqurylymyn jańartýǵa jáne azamattardyń qajettilikterine saı keletin zamanaýı keńistik qalyptastyrýǵa múmkindik beredi.
Aıta ketelik temirjol vokzaldarynyń kelbeti qalaı ózgeretini týraly jazǵan edik.
