Elde 1 mlrd-qa jýyq dárilik zattar qaptamasy tańbalandy
ASTANA. KAZINFORM – 2024 jylǵy 1 shildeden bastap Qazaqstanda dárilik zattardy tańbalaý júıesi engizildi.
Búginde ol eldiń farmatsevtıkalyq naryǵynyń 100%-yn qamtıdy. Dárihana sórelerindegi tańbalanǵan preparattardyń úlesi 70%. Qalǵan bóligi — júıe engizilgenge deıin óndirilgen jáne belgilengen tártippen aınalymnan birtindep shyǵarylyp jatqan dárilik zattar.
Taýarlardy tańbalaý jáne qadaǵalaýdyń biryńǵaı operatory júıesiniń derekterine sáıkes 2024 jylǵy 1 shildeden bastap Qazaqstanda 960 mıllıonnan astam dárilik zattyń qaptamasy tańbalanǵan. Tańbalaý jáne qadaǵalaý júıesi turaqty ósimdi kórsetip, farmatsevtıkalyq naryqty kezeń-kezeńimen qamtýdyń keńeıip kele jatqanyn jáne tańbalanbaǵan ónimderdiń aınalymnan birtindep yǵystyrylyp jatqanyn dáleldeıdi.
Júıe iske qosylǵan alǵashqy aıdyń ózinde 10,2 mıllıonnan astam qaptama tańbalansa, 2024 jyldyń sońyna qaraı aı saıynǵy kólem bes esege jýyq ósip, jeltoqsan aıynda 49 mıllıon qaptamaǵa jetti.
Eger 2025 jyldyń qańtar–sáýir aılary aralyǵynda shamamen 180,5 mıllıon qaptama tańbalanǵan bolsa, 2026 jyldyń osy kezeńinde bul kórsetkish 205,3 mıllıon qaptamaǵa jetti, bul — 24,7 mıllıon qaptamaǵa artyq nemese shamamen 14%-ǵa joǵary. Atalǵan kórsetkishter naryq qatysýshylarynyń tańbalaý júıesine qatysýynyń artyp kele jatqanyn jáne farmatsevtıka salasyndaǵy ashyqtyqtyń kúsheıgenin kórsetedi.
Memlekettik dárilik qamtamasyz etý sheńberinde biryńǵaı dıstrıbıýtor 145 mıllıon qaptama tańbalanǵan preparat satyp aldy. Onyń ishinde 122 mıllıon qaptama nemese 84%-dan astamy — otandyq óndirýshilerdiń ónimi, al 23,6 mıllıony — ımporttyq preparattar.
Tańbalaý júıesi árbir qaptamanyń óndiristen bastap túpki tutynýshyǵa deıingi barlyq kezeńdegi tolyq qadaǵalanýyn qamtamasyz etedi. Sonyń arqasynda memleket sapany baqylaýdyń, jalǵan ónimderdi anyqtaýdyń jáne zańbuzýshylyqtarǵa jedel áreket etýdiń naqty quralyna ıe boldy. Memlekettik satyp alýlardyń ashyqtyǵy Qazaqstannyń farmatsevtıkalyq ónerkásipti qoldaý baǵytyndaǵy dáıekti saıasatyn da aıqyndaıdy.
Tańbalaý júıesiniń tıimdi jumysy Dúnıejúzilik densaýlyq saqtaý uıymynyń keshendi baǵalaýy barysynda farmakologııalyq qadaǵalaý ındıkatoryn baǵalaýda mańyzdy faktorlardyń biri boldy.
Baǵalaý qorytyndysy boıynsha Qazaqstan dárilik zattardy retteý salasynda Jahandyq benchmarkıng quraly sheńberinde úshinshi jetilý deńgeıin (ML3) rastady jáne TMD elderiniń arasynda osy mártebege ıe bolǵan alǵashqy memleket atandy.
Baǵalaý: ulttyq retteýshi júıe, dárilik zattardy tirkeý jáne satýǵa ruqsat berý, farmakologııalyq qadaǵalaý, naryqty baqylaý jáne qadaǵalaý, lıtsenzııalaý, ınspektsııalaý, zerthanalyq zertteýler, sondaı-aq klınıkalyq zertteýlerdi qadaǵalaý sııaqty segiz negizgi ındıkator boıynsha júrgizildi.
ML3 mártebesiniń berilýi dárilik zattardyń aınalymynyń barlyq kezeńinde halyqaralyq standarttarǵa sáıkes kópdeńgeıli sapa tekserisinen ótetinin bildiredi. Bul — qazaqstandyqtar úshin qoldanylatyn preparattardyń qaýipsizdigine beriletin tikeleı kepildik.
Al farmatsevtıka salasy úshin jetilgen retteýshi júıe mártebesi halyqaralyq seriktester tarapynan senimniń artýyna, eksporttyq áleýettiń keńeıýine jáne Qazaqstannyń farmatsevtıkalyq quzyretterdiń óńirlik ortalyǵy retindegi pozıtsııasynyń nyǵaıýyna jańa múmkindikter ashady.
Aıta ketelik elde qyzmetkerdiń skrınıngtik zertteýden ótý tártibi naqtylanǵan edi.
