Elde 1 mıllıonǵa jýyq bala balabaqshaǵa barady

ASTANA.KAZINFORM — Qazaqstanda mektepke deıingi bilim berý júıesi qarqyndy damyp keledi. Memleket basshysynyń tapsyrmasyna sáıkes balabaqshalardy iske qosý boıynsha 2023-2027 jyldarǵa arnalǵan qadamdyq jospary bekitildi. Bul týraly Oqý-aǵartý mınıstrliginiń baspasóz qyzmeti habarlady.

2025 jyly kezekte turǵan 2 jastan 6 jasqa deıingi balalardy sapaly mektepke deıingi bilimmen jáne tárbıemen qamtýdy 95%-ǵa arttyrý josparlanyp otyr. Osy maqsatta jańadan 64 myń oryn ashylady, jyl basynan beri 1,6 myń oryndyq 20 mektepke deıingi uıym qoldanysqa berildi.

Mektepke deıingi bilim berýmen qamtýdy arttyrý jumys jasap turǵan balabaqshalardy salý, rekonstrýktsııalaý, jańǵyrtý, shaǵyn ortalyqtar sanyn arttyrý, sondaı-aq memlekettik tapsyrysty vaýcherlik qarjylandyrý arqyly engizý esebinen júrgiziledi.

— Vaýcherlik qarjylandyrý júıesi iske qosylǵan sátten bastap ata-analarǵa 99 myń vaýcher berildi, bul olar úshin balabaqshany óz betinshe tańdaý múmkindigi. Memlekettik qarajattyń belgili bir uıymǵa emes, naqty balaǵa baǵyttalyp jumsalýy — qarjylandyrý mehanızmin jarııaly etedi. Pılottyq jobaǵa Taraz, Túrkistan, Shymkent, Oral jáne Astana qalalary qatysyp jatyr. Óńirlerdiń daıyndyǵyna qaraı baǵdarlama keńeıtiletin bolady, — deıdi Oqý-aǵartý mınıstrliginiń Mektepke deıingi bilim departamentiniń dırektory Manar Adamova.

Jalpy, 2027 jylǵa deıin keshendi jospar sheńberinde mektepke deıingi uıymdarda jańadan 300 myń oryn qoldanysqa berý josparlanýda. Búgingi tańda Qazaqstanda 11,6 myń balabaqshaǵa 1 mıllıonǵa jýyq bala barady. 

Aıta ketelik jekemenshik balabaqsha salýǵa jer berýge tyıym salynatyny týraly jazǵan edik.