Eldi mekenderge qaýip joq: Mınıstrlik Baıanaýyldaǵy dala órtine qatysty málimdeme jasady
PAVLODAR. KAZINFORM - QR Tótenshe jaǵdaılar mınıstrligi qabyldanǵan sharalardyń nátıjesinde Baıanaýyldaǵy órt aldyn ala 60 gektar alańda oqshaýlanǵanyn habarlady. Buǵan qosa tilsiz jaýdyń eldi mekenderge qaýip tóndirmeıtinin málimdedi.
Mınıstrliktiń Komandalyq ortalyǵynda Tótenshe jaǵdaılar vıtse-mınıstri Ramıl Kamalovtyń basshylyǵymen órtti sóndirý jónindegi jedel shtab óz jumysyn jalǵastyryp jatyr.
- Órtti sóndirýge Tótenshe jaǵdaılar departamentiniń, orman sharýashylyǵynyń, Qazavıaormankúzeti men ormanshylyqtyń kúshteri jáne quraldary dereý jiberilgen. Barlyǵy 85 adam jáne 24-ten astam birlik tehnıka jumyldyryldy. Qatty jel men qurǵaq ósimdikter órttiń tez taralýyna yqpal etip, jedel jumysty qıyndatty. Osyǵan qaramastan qutqarýshylar órttiń eldi mekenderge taralýyna jol bermeı, sóndirý jumystaryn jalǵastyryp jatyr. Turǵyndar úshin qaýip joq. Qabyldanǵan sharalardyń nátıjesinde órt aldyn ala 60 gektar alańda oqshaýlandy, - dep málimdedi mınıstrlikten.
Al Baıanaýyl aýdany ákimdiginiń aqparynsha, dala órtin sóndirýge 200-ge jýyq adam jumyldyrylǵan.
- Tilsiz jaýmen kúresýge Toraıǵyr, Birlik, Aımaýytov aýyldarynyń, Baıanaýyl memlekettik ulttyq tabıǵı parkiniń, tótenshe jaǵdaılar bóliminiń tehnıkalary men qyzmetkerleri dereý shyqty. Sondaı-aq oblystyq Tótenshe jaǵdaılar departamentinen qosymsha tehnıkalar kómekke keldi. Apat alańynda jeke tulǵalardyń kólikteri de órtti aýyzdyqtaý úshin qyzmette. Qatty jeldiń áserinen qıyndyqtar týyndaǵanymen, qazirgi ýaqytta kóptiń kúshimen órt báseńdedi. Jaqyn mańdaǵy aýyldardan órtti sóndirýge kelip jatqan adam kúshi men tehnıkalar áli de tolastaǵan joq, - dep habarlady aýdan ákimdiginen.
Jergilikti turǵyndar túsirgen beınejazbalarda qalyń órtten Jasybaı ormanshylyǵyndaǵy ǵımarattardyń órtenip jatqanyn kórýge bolady. Baıanaýyl aýdanynyń ákimdigi ázirshe bul ǵımarattardyń kimge tıesili ekenin aıta almady.
Eske sala keteıik, Baıanaýylda ulttyq parkke qarasty jerler órtenip jatyr.