Eldi mekenderdiń ınfraqurylymyn damytýda keshendi tásil qoldaný kerek – Úkimet basshysy
ASTANA. KAZINFORM – Eldi mekenderdiń ınfraqurylymyn damytýda keshendi tásil qoldaný kerek. Bul týraly búgin Úkimet otyrysynda Premer-Mınıstr Oljas Bektenov aıtty.
«Óńir ákimdikterimen birge aýyldyq eldi mekenderdiń ınfraqurylymyn damytýda keshendi tásildi qoldaný kerek. Óńirlik standarttar júıesin negizgi baǵdarlamalyq qujattarmen ózara úılestirýdi qamtamasyz etý qajet. Bul oraıda, jobalardyń basymdyǵyn jáne aýyl turǵyndarynyń barlyǵyna birdeı ıgilikter men qyzmetterdiń qoljetimdi bolýyn nazarda ustaý kerek. Áıtpese, keıbir aýyldarda 2 medpýnkt bar, al keı jerlerde birde-bireýi josparlanbaǵan. Basqa obektilerge qatysty jaǵdaı da osyndaı. Mundaı kemshilikterge jol berýge bolmaıdy», - dedi Úkimet basshysy.
Oljas Bektenov Ulttyq ekonomıka mınıstrligi Qarjy mınıstrligimen birlesip, qoldanystaǵy bıýdjet zańnamasyn jetildirý aıasynda aýyldaǵy tynys-tirshilikti qamtamasyz etý máselelerin sheshýdiń tıimdiligin arttyrý úshin aýyldyq okrýgter ákimdikteriniń kiris bazasyn keńeıtý máselesin pysyqtaýy qajettigin basa aıtty.
«Aýylda ınfraqurylymdyq jobalardy iske asyrýǵa bıýdjetten tys qarajat tartý boıynsha ákimdikterdiń jumysyn baǵalaý úshin naqty ındıkatorlardy aıqyndaý kerek. Oblys ákimdikteri Aýyldyq aýmaqtardy damytý tujyrymdamasynyń is-sharalaryna bólinetin bıýdjet qarajatynyń tıimdi ıgerilýin qamtamasyz etýge tıis», - dedi Premer-Mınıstr.
