Eldi kórkeıtýge árbir azamat atsalysýy kerek — Prezıdent
ASTANA. KAZINFORM — Prezıdent Qasym-Jomart Toqaev eldi mekenderdi damytý men halyqtyń turmys sapasyn arttyrýdy tek memlekettiń mindeti dep qaraýǵa bolmaıtynyn aıtty. Memleket basshysy azamattardy óz aýylyn, qalasyn kórkeıtýge belsendi atsalysýǵa shaqyrdy.
Prezıdent elimizdiń kelbetin jáne turpatyn ózgertý, taza ári tııanaqty orta qalyptastyrý — barshamyzdyń ortaq mindetimiz ekenin atap ótti.
— Halqymyzda «Yntymaq túbi — ıgilik» degen sóz bar. Azamattarymyz ózderi turyp jatqan eldi mekenge qamqorlyq tanytqany jón. Árbir adam óz úıin, aýylyn, qalasyn kórkeıtýge belsene atsalysqany abzal, — dedi Q. Toqaev Qazaqstan Halyq Keńesiniń birinshi sessııasynda.
Keıbir kásipkerler tutas aýyldy gúldendirýge zor yqpal etýde. Elimizde mundaı tamasha tájirıbeler bar.
— Biz úshin eldi mekenderimizdi damytýǵa, onda turyp jatqan azamattardyń turmys sapasyn arttyrýǵa áser etetin kez kelgen bastama mańyzdy. Aımaqtarǵa paıdasy tıetin isten Halyq Keńesiniń músheleri de shet qalmaýy kerek. Bul sharýany tek memleketke júktep qoıýǵa bolmaıdy. Azamattarymyz da bul mindetke jaýapkershilikpen qarap, belsendi, tabandy jáne elge janashyr bolýy qajet, — dedi Memleket basshysy.
Sonymen birge, Prezıdent birligimizdi nyǵaıtyp, halyq ıgiligi úshin jumyla jumys isteý kerektigin aıtty. Bılik, ókildi organdar jáne azamattyq qoǵam birlesip áreket etse, aýyl da, qala da, ıaǵnı, tutas memleket ósip-órkendeıtini anyq.
— Qalalardy, kóshelerdi, saıabaqtardy tazalyqta ustaý, elimizdiń jańa turpatyn qalyptastyrý bul — búkil halqymyzdyń bolmysyn ózgertý, memleketimizdi dúnıe júzindegi eń órkenıetti elderdiń qataryna qosý degen sóz. Bul — ulttyq namysymyzǵa qatysty asa mańyzdy mindet, — dedi Qasym-Jomart Toqaev.
Buǵan deıin Prezıdent 1 jylda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
Qasym-Jomart Toqaev Qazaqstannyń 7 jyldaǵy negizgi kórsetkishterin atady.
Sondaı-aq Halyq Keńesi men Quryltaı bir-biriniń jumysyna aralaspaıdy.
