Elbrýsqa kóterilý kezinde 11 jastaǵy bala qaza tapty
ASTANA. KAZINFORM – Kabardın-Balqar Respýblıkasyndaǵy Elbrýs taýyna kóterilý kezinde 11 jastaǵy bala qaza taýyp, onyń ákesi aýyr jaraqat aldy, dep habarlaıdy Kazinform TASS agenttigine silteme jasap.
Tergeý málimetinshe, shyńǵa kóterilgender 1986 jáne 2015 jyly týǵan ákesi men balasy bolǵan.
Aldyn ala málimet boıynsha, 19 shildede eki adamnan quralǵan top Elbrýstyń shyǵys shyńyna kóterilip bara jatqan kezde shamamen 4,2 myń metr bıiktikte jartastan qulap ketken.
Saldarynan bala oqıǵa ornynda kóz jumdy, al ákesi aýyr jaraqat aldy. Zardap shekken azamatqa Reseı TJM-niń Elbrýs joǵary taýly izdestirý-qutqarý jasaǵy men «Lıder» ortalyǵynyń qutqarýshylary jiberildi.
Oqıǵaǵa baılanysty tergeý organdary tekserý júrgizip jatyr. Kabardın-Balqar prokýratýrasy da oqıǵanyń barlyq mán-jaıynyń anyqtalýyn baqylaýǵa aldy.
Eske sala ketsek, buǵan deıin Qosshy qalasyndaǵy demalys ornynda basseın sýyna alty jasar bala batyp ketkenin jazdyq.
