Elbrýs taýynda bir táýlikte 6 alpınıst kóz jumdy
ASTANA. KAZINFORM — Elbrýs taýynda bir táýlik ishinde 6 alpınıst qaza tapty. Olardyń beseýi — 7 adamnan turatyn top quramynda taýǵa kóterilgen Bosnııa jáne Gertsegovına azamattary. Al bireýi basqa toptyń quramynda bolǵan reseılik alpınıst, dep habarlaıdy TASS.
Oqıǵaǵa baılanysty tergeý júrgizilip jatyr.
Qaıǵyly jaǵdaı Kabardın-Balqarııadaǵy Elbrýsqa kóterilý kezinde bolǵan. Tergeý málimetinshe, Bosnııa jáne Gertsegovınanyń 7 azamaty 24 shildede taýǵa kóterilgen. Kelesi kúni keshke aýa raıynyń kúrt nasharlaýyna baılanysty alpınıster baǵyttan adasyp ketken.
Top músheleriniń bireýi taýdan ózdiginen túsip, qutqarýshylarǵa shamamen 5,1 myń metr bıiktikte eki seriginiń jaǵdaıy nasharlap, qaıtys bolǵanyn habarlaǵan. Keıin júrgizilgen izdeý-qutqarý jumystary barysynda Tótenshe jaǵdaılar mınıstrliginiń qyzmetkerleri tiri qalǵan taǵy bir adamdy jáne úsh adamnyń denesin tapqan. Osylaısha, bul toptaǵy qaza tapqandar sany beseý boldy.
TJM málimetinshe, qutqarýshylar eki marqumnyń denesin Azaý alańyna jetkizdi. Qatty boran men ekpindi jelge baılanysty qalǵan máıitterdi túsirý jumystary aýa raıy jaqsarǵanǵa deıin keıinge qaldyryldy.
Sol kúni Elbrýs taýynda taǵy bir qaıǵyly oqıǵa boldy. Stavropol ólkesi men Týla oblysynan kelgen eki alpınısten quralǵan tirkelgen top shamamen 5,3 myń metr bıiktiktegi Red Fox lashyǵy mańynan kómek suraǵan. Oqıǵa ornyna jetken qutqarýshylar alpınısterdiń biriniń qaza tapqanyn anyqtap, ekinshisin evakýatsııalady. BAQ málimetinshe, ólimge gıpotermııa, ıaǵnı deneniń qatty tońýy sebep bolǵan.
Kabardın-Balqarııa boıynsha Tergeý basqarmasy eki nemese odan da kóp adamnyń abaısyzda qaza bolýyna ákep soqqan áreketke qatysty qylmystyq is qozǵady. Qaıǵyly oqıǵalardyń mán-jaıy anyqtalyp jatyr.
Eske sala keteıik, Elbrýsqa kóterilý kezinde 11 jastaǵy bala qaza tapty.
