El boıynsha 2,3 myńnan asa áleýmettik qyzmetker kásibı biliktiligin rastady
ASTANA. KAZINFORM — Qazaqstanda áleýmettik qyzmetkerlerdiń kásibı biliktilik júıesin damytý jalǵasýda. Búgingi tańda el boıynsha 2,3 myńnan astam maman kásibı biliktilikti resmı taný rásiminen sátti ótti, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Eske sala keteıik, bul tetik QR Eńbek jáne halyqty áleýmettik qorǵaý mınıstrligi tarapynan mamandyqtyń mártebesin arttyrý jáne kórsetiletin arnaýly áleýmettik qyzmetterdiń sapasyn jaqsartý maqsatynda engizilgen.
Eldegi áleýmettik qyzmetkerlerdiń jalpy sany 12 235 adamdy quraıdy, onyń ishinde 1 251 maman úkimettik emes sektorda jumys isteıdi.
Kadrlardy daıarlaýdyń joǵary deńgeıin qamtamasyz etý úshin eki kásibı standart bekitildi: «Áleýmettik jumys jáne áleýmettik saladaǵy ózge de mamandyqtar» jáne «Arnaýly áleýmettik qyzmetter kórsetetin mamandar». Budan bólek, Skills.enbek.kz platformasynda keıs-menedjment pen ınklıýzıvti tásilderdi qosa alǵanda, beıindik bilim berý modýlderi ornalastyrylǵan. Bul kýrstardan 11 myńnan astam áleýmettik qyzmetker ótip, tıisti sertıfıkattarǵa ıe boldy.
— Áleýmettik qyzmetkerlerdiń kásibı quzyretteri deńgeıi týraly málimetterdi qamtıtyn Áleýmettik qyzmetkerler tiziliminiń qurylýy — mańyzdy kezeńderdiń biri boldy. Sonymen qatar, Áleýmettik qorǵaý salasyn damytýdyń ulttyq ǵylymı ortalyǵy bazasynda biliktilikti taný tetigi engizildi, ol 2025 jylǵy maýsymnan bastap respýblıka boıynsha turaqty negizde qoldanylady. Búgingi kúni 2 311 maman óz bilimderi men daǵdylaryn rastady, — delingen mınıstrlik habarlamasynda.
Biliktilikti taný sertıfıkaty attestattaýdan ótý jáne biliktilik sanatyn berý kezinde negizgi qujatqa aınaldy. Bul mamandardyń kásibı ósýine jáne mamandyq bedeliniń artýyna yqpal etedi.
Jalpy alǵanda, quzyretterdi baǵalaý jáne úzdiksiz oqytý júıesin engizý kadrlardy daıarlaýdyń joǵary deńgeıin qamtamasyz etýge jáne halyqqa kórsetiletin arnaýly áleýmettik qyzmetterdiń sapasyn arttyrýǵa baǵyttalǵan.
Buǵan deıin Kazinform tilshisi egde tartqan adamdarǵa, múgedektigi bar adamdarǵa qamqorlyq kórsetip júrgen áleýmettik qyzmetker Gúlmıra Týleýbaevanyń bir kúnimen tanysqan edi.