El boıynsha 14,5 mln gektar aýyl sharýashylyǵy daqyldary egildi
ASTANA. KAZINFORM — Kóktemgi egiske 133 myńnan astam traktor jumyldyryldy, dep habarlaıdy Aýyl sharýashylyǵy mınıstrliginiń baspasóz qyzmeti.
— Qazaqstanda kóktemgi dala jumystary qarqyndy túrde jalǵasyp jatyr. Oblys ákimdikteriniń jedel málimetterine sáıkes, búgin aýyl sharýashylyǵy daqyldary 14,5 mln gektar alqapqa sebildi. Atap aıtqanda, dándi daqyldar 10 mln gektarǵa, maıly daqyldar — 3,2 mln gektarǵa, mal azyqtyq daqyldar — 861,4 myń gektarǵa, maqta — 167,3 myń gektarǵa, kókónis daqyldary — 109,1 myń gektarǵa, baqsha daqyldary — 80,3 myń gektarǵa, kartop — 107,7 myń gektarǵa, qant qyzylshasy — 22 myń gektarǵa egildi, — delingen habarlamada.
Egis naýqanyn daıarlaý jáne ótkizý baǵytyndaǵy negizgi jumystardyń biri — aýyl sharýashylyǵy taýaryn óndirýshilerdi mıneraldy tyńaıtqyshtarmen qamtamasyz etý.
2026 jylǵa arnalǵan tyńaıtqysh engizý jospary 2,3 mln tonnany quraıdy. Ákimdikterdiń jedel derekterine sáıkes, qazirgi ýaqytta 1,5 mln tonna tyńaıtqysh jetkizýge kelisimsharttar jasalyp, 1,3 mln tonnasy jóneltildi.
Sharýalardy tyńaıtqyshpen qamtamasyz etý qoljetimdiligin arttyrý maqsatynda óńirlerdiń jergilikti bıýdjetterinde 2026 jylǵa tyńaıtqysh qunyn sýbsıdııalaýǵa 56,3 mlrd teńge qarastyrylǵan.
Jalpy, elimizdiń aýyl sharýashylyǵy qurylymdarynda 133,9 myń traktor, shamamen 5,6 myń joǵary ónimdi egis kesheni, 71,4 myń sepkish jáne 188,5 myń topyraq óńdeý tehnıkasy bar. Agrarlarǵa úzdiksiz tehnıkalyq qoldaýdy 70 servıstik ortalyq qamtamasyz etedi.
Buǵan deıin Qazaqstannyń Túrikmenstanǵa aýyl sharýashylyǵy taýarlary eksportynyń kólemi óskenin jazǵanbyz.
