El bolashaǵy — eldiń qolynda: astanalyqtar referendým týraly ne deıdi

ASTANA. KAZINFORM — Qazaqstan úlken saıası ózgerister qarsańynda tur. Aldaǵy jalpyhalyqtyq referendým — memlekettiń damý baǵytyn aıqyndaıtyn mańyzdy qadam. Osy oraıda Kazinform tilshisi elorda turǵyndarynyń pikirin jáne astanalyqtardyń bul naýqanǵa degen kózqarasyn surap kórdi. 

Qatysýshylardyń basym bóligi referendýmǵa qatysýdy árbir qazaqstandyqtyń azamattyq boryshy dep biledi. Kópshiliktiń pikirinshe, bul sátte beıjaı qalý — bolashaqqa nemquraıdy qaraýmen teń.

Máselen elordalyq jastar bul máselege erekshe jaýapkershilikpen qarap otyr. 22 jastaǵy qala turǵyny Danıal Ǵappas ár daýystyń salmaǵy bar ekenin alǵa tartady.

— Árbir qazaqstandyqtyń daýysy mańyzdy, sebebi bul bizdiń erteńimizge tikeleı áser etedi. Jeke ózim eshbir saılaýdan qalǵan emespin jáne bul joly da óz tańdaýymdy jasaımyn, — deıdi ol.

Bul oıdy bolashaq zańger Abdyhalyq Nurdáýlet te qýattady. Onyń paıymdaýynsha, saıası saýattylyq pen belsendilik — qoǵamnyń damý kórsetkishi.

— Eger árbir azamat óz úlesin qosyp, eldegi bolyp jatqan jaǵdaılardan habardar bolsa, bul memlekettiń nyǵaıýyna septigin tıgizedi. Men úshin bul qadam erekshe mańyzdy, óıtkeni mamandyǵym zań salasymen tyǵyz baılanysty. Sondyqtan mindetti túrde daýys berýge baramyn, — dep atap ótti Nurdáýlet.

Saýalnamaǵa qatysqan ózge de qala turǵyndary el ishindegi oń ózgeristerge úmitpen qaraıtyndaryn jasyrmady. Olar barsha otandastaryn mańyzdy tarıhı sátte shet qalmaı, birlik pen belsendilik tanytýǵa shaqyrdy.

Aıta keteıik, Ortalyq referendým komıssııasy ýchaskelerdiń daýys berýge daıyn jáne zańnama talaptaryna saı ekendigin aıtqan edi.