Elbasynyń júldesi úshin qazaq kúresinen uıymdastyrylatyn «Qazaqstan barysy» jarysynyń bıylǵy kezeńi bastaldy

Bul týraly búgin Dúnıejúzilik qazaq kúresi federatsııasynyń prezıdenti Serik Tókeev atalmysh jarystyń bastalýyna baılanysty jýrnalıstermen arnaıy uıymdastyrylǵan baspasóz máslıhatynda málim etti. 

Onyń sózinshe, jarys 4 kezeńnen turady. Onyń  1-kezeńi elimizdiń túkpir-túkpirindegi eldi mekenderde ótedi. Odan ári sport básekesi aýdandyq, oblystyq jáne respýblıkalyq deńgeıde jalǵasady. Jarystyń sońǵy, ıaǵnı aqtyq kezeńi bıylǵy qyrkúıek aıynda Astanada ótedi dep kútilýde. 

«Jarys Halyqaralyq qazaq kúresi federatsııasy men Sport jáne dene shynyqtyrý agenttiginiń bekitken erejesi negizinde uıymdastyrylady. Biz osyǵan deıin qazaq kúresinen kóptegen jarystar uıymdastyryp, solardyń arasynda qazaq kúresine baılanysty eń úzdik degen ádister iriktelip, olar osy jolǵy jarysty uıymdastyrý erejesine engiziledi. Bıylǵy «Qazaqstan barysy» jarysyna ár oblystan jáne Astana men Almaty qalalarynan eń myqty degen 2 balýannan qatysady»,- dedi Dúnıejúzilik qazaq kúresi federatsııasynyń prezıdenti. 

Uıymdastyrýshylardyń málimetterinshe, «Qazaqstan barysy» jarysyna bıyl elimizdiń ár aımaǵynan 2 sportshydan qatysady. Al ótken jyly jarysqa aımaqtardan 4 sportshydan qatysqan. Sondaı-aq bıyl jarysqa «Samuryq-Qazyna» ál-aýqat qory» aktsıonerlik qoǵamy demeýshilik etedi. Al ótken jyly jarysty Qyzylorda oblysynyń ákimdigi qarjylaı qoldaǵan bolatyn. Syılyqtar 8 orynǵa deıingi jeńimpazdarǵa beriledi. Jeńimpazdardyń bapkerleri de syılyqtan qur qalmaıdy. 

«KTK» telearnasynyń Bas dırektory, «Qazaqstan barysy» jobasynyń avtory - Arman Shoraevtyń aıtýynsha, jarystyń júlde qory ótken jyly 265 myń AQSh dolaryn qurasa, bıylǵy jyly ol 50 mıllıon teńgege jetip otyr. Bul ótken jylǵy qordan 1,5 esege artyq. Budan bólek biz Ulttyq bankpen kelisip, salmaǵy 777 gramm bolatyn «Altyn taıtuıaq» jasap jatyrmyz. Jarystyń bas júldesi 150 myń AQSh dollaryn jeńip alǵan azamat kóne dástúr boıynsha osy «Altyn taıtuıaqty» da oljalaıdy. Jarysty jáne jalpy qazaq kúresin eń belsendi nasıhattaǵan jýrnalıster de uıymdastyrýshylardyń nazarynda bolady.

Sport básekesine elimizdegi ataqty sportshylar da qatysa alady jáne olar tek Qazaqstan azamattary bolýlary kerek. Shet memleketterden sportshylar qatystyrylmaıdy. Aqtyq kezeń, ıaǵnı jarystyń fınaly elordamyz Astanada ótedi. «Qazaqstan barysy» jarysynyń aqtyq kezeńin kórýshiler sanynyń ótken jyly tym kóp bolyp, «Dáýlet» sport keshenine syımaýyna baılanysty jarystyń fınaldyq kezeńi bıyl velotrekte ótkizilýi yqtımal. Jarystyń aýyldyq aımaqtardan bastap ótetin irikteý sharalary «Qazaqstan» telearnasynan tikeleı efırde kórsetiledi. Al fınaldyq jarys birneshe respýblıkalyq telearnadan taratylady.