Elbasynyń Joldaýyna sáıkes Alataý aýdany ákiminiń apparaty aldaǵy josparlaryn aıqyndady - M.Balabaeva
ALMATY. Aqpannyń 9-y. QazAqparat / Ádilet Musahaev / - Elbasynyń Joldaýyna sáıkes Alataý aýdany ákiminiń apparaty aldaǵy mindetterin naqtylap, josparlaryn aıqyndady. Bul jaıynda aýdan ákiminiń orynbasary Marjan Balabaeva Prezıdenttiń jańa Joldaýyn talqylaý barysynda aıtty,
dep habarlaıdy QazAqparat.
M.Balabaevanyń aıtýynsha, osy jyly Alataý aýdanynyń damýyna 10 mıllıard 281 mıllıon teńge kóleminde qarjy bólingen. Onyń ishinde, qurylys salasyna - 5 mıllıard 400 mıllıon teńge, joldardy ortasha jóndeýge 265 mıllıon teńge jáne aýdannyń ınjenerlik-kommýnıkatsııalyq ınfraqurylymyn qamtamasyz etý úshin 4 mıllıard 613 mıllıon teńge qarastyrylǵan.
«2010 jyly Alataý aýdanyndaǵy bilim salasy nysandaryn salý baǵytynda «Darhan» yqsham aýdanynda 320 oryndyq balabaqsha, «Áıgerim» yqsham aýdanynda 120 oryndyq, «Trýdovık» yqsham aýdanynda 320 oryndyq balabaqsha salý josparlansa, «Darhan», «Alǵabas» yqsham aýdandarynda 1200 oryndyq mektep, «Alǵabas» yqsham aýdanynda 720 oryndyq kásiptik- tehnıkalyq mektep salý úshin jobalyq-smetalyq qujattardy daıyndaý josparlanyp otyr», deıdi ákimniń orynbasary.
Sondaı-aq ol Elbasy 2020 jylǵa deıin orta bilim berýde 12 jyldyq oqytý modeliniń tabysty jumys isteýin qamtamasyz etýdi, kásiptik jáne tehnıkalyq bilim berýdi kásibı standarttarǵa negizdeýdi, al joǵary bilim sapasyn joǵary halyqaralyq talaptarǵa sáıkestendirýdi mindettep otyrǵandyǵyn aıtty.
«Jańa Joldaýǵa sáıkes, Uly Otan soǵysyndaǵy Jeńistiń 65 jyldyǵyna oraı, árbir soǵysqa qatysýshy men soǵys múgedekterine 65 myń teńge mólsherinde bir jolǵy járdemaqy tólenetin bolady. Sonymen qatar, soǵysqa qatysýshylar men múgedekteriniń jeńildikpen júrýleri úshin 383 mıllıon teńge qarastyrylǵan», deıdi M.Balabaeva.
