Elbasynyń Joldaýy jastarǵa jańa múmkindikter beredi - sarapshy
ASTANA. QazAqparat - QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń sarapshysy Jumabek Sarabekovtyń paıymynsha, búgin jarııalanǵan Joldaýdy júzege asyrý jastarǵa jańa múmkindikter beredi, dep habarlaıdy QazAqparat.
«Joldaýda ekpin qoıylyp otyrǵan mańyzdy baǵyttardyń biri memlekettik basqarýdyń tıimdiligin arttyrýǵa negizdelgen. Bul tıimdilikti arttyrý úshin jańa tehnologııalardy qoldanýdyń múmkindigi zor. Sonymen qatar osy turǵyda bıznesti qoldaýǵa erekshe mán berilip otyr, ıaǵnı bıznestiń aldyndaǵy kedergilerdi barynsha joıyp, olarǵa qosymsha múmkindik jasaý eskerilgen. Osy oraıda biz bıznes protsesterin jeńildetýimiz kerek», - dep toqtaldy J. Sarabekov.
Onyń paıymynsha, memlekettik ákimshilendirý úderisterin jańa tehnologııalar arqyly jeńildetýimiz qajet. Sebebi bıznes klımatyn jaqsartpasaq, onda shaǵyn jáne orta bıznestiń damýy múmkin emes.
«Jalpy alǵanda, búgin jarııalanǵan Joldaý osyǵan deıin memlekettik deńgeıde qabyldanǵan damý baǵdarlamalarymen sabaqtas. Ónerkásiptik revolıýtsııanyń múmkindikterin ózimizdiń damý maqsatymyzǵa paıdalaný - Joldaýdyń basty ıdeıasy retinde atap kórsetilgen. Jańa tehnologııalardy engizý tek qana memlekettik basqarýda ǵana emes, sonymen qatar ındýstrııaldy damý, aýyl sharýashylyǵy, kóliktik-logıstıkalyq keshen, bilim berý men densaýlyq saqtaý salalary eskerilip otyr», - deıdi ol.
Budan bólek, J. Sarabekov Joldaý aıasynda Úkimetke vıza máselelerin jeńildetý tapsyrylǵanyn eske salyp ótti.
«Investorlarmen tyǵyz baılanysta jumys isteý úshin vızalyq jeńildikter qajet ekeni anyq. Sondyqtan ınvestıtsııa tartý mańyzdy ekenin eskere otyryp, osy baǵytqa basa nazar aýdarýymyz kerek», - dep toqtaldy ol.
Munymen qosa, sarapshy álemdik ekonomıkadaǵy keıbir keri protsesterge qaramastan, Qazaqstan óziniń áleýmettik mindettemelerin tolyq kólemde oryndap otyrǵanyn atady.
«Osy oraıda elimiz áleýmettik mindettemelerge kepildik berip, áleýmettik tólemder kólemin arttyrýǵa qaýqarly. Máselen, muǵalimderdiń eńbekaqysyn arttyrý - saladaǵy jumystardy yntalandyryp, sapaǵa da áser etetini sózsiz. Árbir adam óziniń jumysynan jaqsy áser alý kerek. Sondyqtan bul turǵyda ustazdardyń mártebesin kóterýge aıryqsha mán berilip otyrǵany anyq. Endi jastardyń osy salaǵa tartylýyna oń yqpaly tıedi degen pikirdemin», - dep túıindedi sózin Jumabek Sarabekov.
Aıta keteıik, búgin QazaqstanRespýblıkasynyń Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalandy.
