Elbasynyń joldaýy - otandyq ǵylymǵa kórsetilgen úlken qoldaý
«Elbasymyz N.Á. Nazarbaevtyń halyqqa arnaǵan bıylǵy joldaýynda bilim berý, ǵylym máselelerine qatysty aıtylǵan jaılardy erekshe yqylaspen tyńdadyq. Prezıdent Qazaqstandaǵy adam kapıtalyn sapalyq jaǵynan ósirý úshin bilim berý máselesine nazar aýdarý kerektigin basa aıtty. Máselen, jas otbasylardy qoljetimdi baspanamen qamtamasyz etý máselesi. Qazirgi tańda bilimdi, talantty, ǵylymǵa ıkemi bar jastar shoǵyry ósip kele jatyr. Jasyratyny joq, burynǵy kezderi ondaı túlekterimizdiń kópshiligi jalaqysy joǵary jekemenshik nemese sheteldik kompanııalarǵa ketip qalatyn. Sońǵy jyldary JOO oqytýshylarynyń ǵylymmen aınalysatyndardyń jalaqysynyń kóterilýi, sheteldegi joǵary oqý oryndarynan taǵylymdamadan ótý múmkindigi, taǵy sol sııaqty kóptegen ıgi sharalar talantty jastarymyzdyń bilim berý men ǵylym salasyna bet burýyna sebep bolýda. Al endi qoljetimdi baspanamen qamtamsyz etý arqyly jas mamandarymyzdyń eń basty máselesin sheshsek, bul jaǵdaı otandyq bilim berý men ǵylym salasynyń damýyna keńinen jol ashady», - dedi Perızat Úrkimbaeva.
Prezıdenttiń el ekonomıkasy úshin jańa kadrlar daıarlaıtyn joǵary oqý oryndarynyń materıaldyq-tehnıkalyq bazasyn qalyptastyrý úshin 2017 jylǵa deıin 10 mlrd teńge kóleminde qarjy bólinetinin jarııalaýy ǵylym salasyna kórsetilgen úlken janashyrlyq, úlken qoldaý dep túsinemin, - deıdi bilikti maman.
«Osy turǵydan kelsek, ál-Farabı atyndaǵy QazUÝ-dyń hımııa jáne hımııalyq tehnologııa fakýltetinde ınnovatsııalyq jańalyqtar tóńireginde jumys isteý jolǵa qoıylǵan. Qazirgi kúni álem ǵalymdary erekshe nazar aýdaryp otyrǵan transgýmanızm, ıaǵnı adam men onyń aqyl oıyn jasandy dene men mıǵa aýystyrýdy júzege asyrý ıdeıasyna qatysty ǵylymı zertteýler júrgizilýde. Ál-Farabı atyndaǵy QazUÝ ǵalymdary da mańyzdylyǵy jaǵynan budan kem emes ǵylymı jobalarmen aınalysýda. Ýnıversıtettiń hımııa jáne hımııalyq tehnologııa fakýlteti «Organıkalyq zattardyń, tabıǵı qosylystar men polımerler hımııasy men tehnologııasy» kafedrasynyń ǵalymdary júzege asyryp jatqan aýqymdy jobalardyń biri - gıdrofıldi, ıaǵnı sýda erıtin polımerler negizinde jumys isteıtin, jyldam evolıýtsııalanatyn neırondyq jelilerdi jasaýǵa baǵyttalǵan. Mundaı jeliler adam zerdesiniń paıda bolýyna alyp kelgen úderisterdi modeldeýge qabiletti. Al olardy jasaý qazirgi kúni óte kókeıtesti máseleniń biri bolyp otyr», - dedi ol.
Mamannyń aıtýynsha, munyń barlyǵy gıdrofıldi polımerler men olardyń negizindegi keshender salasyndaǵy qazaqstandyq fızıka-hımııalyq mektepterdiń jınaqtaǵan tájirıbelik jumystarynyń arqasynda múmkin bolyp otyr.
«Dál osy saladaǵy álemdik reıtıngte qazaqstandyq ǵylymı toptar aldyńǵy oryndarda tur. Tipti álemdegi ekonomıkasy myqty damyǵan elderdegi jetekshi ǵylymı toptardan kem túspeıdi. Asa bedeldi jáne álem moıyndaǵan «Thomson Reuters» aqparattyq kompanııasynyń derekteri boıynsha, QR UǴA akademıgi E.M. Shaıqutdinov qurǵan ál-Farabı atyndaǵy QazUÝ-dyń polımerler mektebiniń úsh birdeı ókili sońǵy bes jylda ınterpolımerlik komplekster salasyndaǵy álemdegi barlyq ǵalymdar men mamandar arasynda alǵashqy úsh orynda tur. Búkil postkeńestik keńistikte birde-bir ǵylymı mektep osy kúnge deıin mundaı nátıjege qol jetkizbegeni anyq. Álemniń ekonomıkasy myqty damyǵan elderinde de mundaı ǵylymı mektepter sanaýly ǵana. Árıne, osynyń barlyǵy ǵylymnyń zamanaýı baǵyttaryn damytýǵa memleket tarapynan jasalyp otyrǵan qamqorlyqtyń arqasynda múmkin bolyp otyr.
Elbasymyz N.Á. Nazarbaevtyń Qazaqstan halqyna joldaýynda bilim berý, ǵylym salasyna qatysty aıtqan qadaý-qadaý oılary otandyq ǵalymdarymyzdyń zamanaýı, tyń ıdeıalaryn júzege asyrýǵa jańa serpin bereri sózsiz»,- dep qorytyndylady pikirin P.Úrkimbaeva.
