Elbasynyń jol polıtsııasynda sybaılas jemqorlyqpen kúresti kúsheıtý jónindegi tapsyrmasynyń oryndalýyna basa nazar aýdarylady - S.Baımaǵanbetov
ASTANA. Qazannyń 30-y. QazAqparat /Quralaı Orynbekqyzy/ - Elbasynyń jol polıtsııasynda sybaılas jemqorlyqpen kúresti kúsheıtý jónindegi tapsyrmasynyń oryndalýyna basa nazar aýdarylady.
Bul týraly búgin aımaqtarmen konferentsbaılanys formatynda ótken Jemqorlyqpen kúres jónindegi respýblıkalyq qoǵamdyq keńestiń kóshpeli 11-shi otyrysynda QR Іshki ister mınıstri Serik Baımaǵanbetov aıtty, dep habaralaıdy QazAqparat tilshisi.
«Bul salada júıeli sharalardyń kesheni quryldy. Sońǵy 6-7 jylda jol polıtsııasy statsıonarlyq beketteriniń sany 189-dan 35-ke deıin qysqartyldy. Atalǵan jyldar ishinde jol polıtseıleriniń sany da 12 myń 500-den 5 myń 800-ge deıin azaıdy. Olardy ary qaraı qysqartý múmkin emes. Qazir barlyq jol-kólik apattary jónindegi ákimshilik materıaldardy sottar ǵana qarastyrady», dep atap ótti mınıstr.
