Elbasynyń jedelhaty G.Golovkındi qanattandyrdy
ASTANA. QazAqparat - Memleket basshysy Nursultan Nazarbaevtyń atynan quttyqtaý jedelhaty Gennadıı Golovkınge jekpe-jek aıaqtalǵannan keıin birden tabystaldy, dep habarlady QR Syrtqy ister mınıstrliginiń baspasóz qyzmetinen.
«Bizdiń Memleket basshymyz Nursultan Ábishuly Nazarbaevqa qoldaý kórsetip, túsinistikpen qaraǵany úshin sheksiz rızamyn. Bul - men úshin zor mártebe. Meniń jekpe-jegimdi kórgeni úshin qýanyshtymyn. Bul - barsha Qazaqstannyń jeńisi. Bizdiń týymyz kóterilip, ánuranymyz shyrqaldy. Bizdiń elimiz tamasha. Men barsha qazaqstandyqtarǵa densaýlyq pen zor tabys tileımin», - deıdi G.Golovkın.
«Jekpe-jek qarsańynda óte qaýyrt jumystar júrgizildi. Gennadıı 12 keli salmaq, onyń 2,5 kelisin sońǵy úsh kúnniń ishinde túsirýi tıis edi. Prezıdent Nursultan Nazarbaevtan jedelhat alý Gennadııdi qanattandyra tústi», - deıdi G.Golovkınniń qasynda sońǵy bes kún boıy bolǵan Muhtar Tinikeev.
Aıta keteıik, Ult kóshbasshysy Nursultan Nazarbaev qazaqstandyq boksshy Gennadıı Golovkınge 2014 jyly 26 shildede avstralııalyq Denıel Gılmen ótetin jekpe-jekte jeńis tilegen jedelhatyn boksshyǵa Nıý-Iorktegi QR Bas konsýldyǵy tabys etken bolatyn.
Sonymen qatar Elbasy bokstan WBA jáne IBO tujyrymy boıynsha kásipqoılar arasyndaǵy álem chempıony ataǵyn qorǵap qalǵany úshin Gennadıı Golovkınge quttyqtaý jedelhatyn joldady. Memleket basshysy G.Golovkınniń jeńisi boksty súıetin kópshilik qaýym jáne barsha qazaqstandyq jankúıerler úshin tamasha tartý bolǵanyn atap ótti.
«Laıyqty qarsylaspen adal básekede sen jaýyngerlik minez, qaısar rýh tanytyp, daıyndyǵyńnyń myqty ekenin kórsettiń, ózińniń úzdik ekenińdi taǵy da dáleldediń, Qazaqstannyń halyqaralyq deńgeıdegi abyroı-bedelin arttyrdyń. Biz seniń jeńisińdi maqtan etemiz», - delingen jedelhatta.
Esterińizge sala keteıik, búgin bokstan orta salmaq dárejesinde WBA (Super) men IBO boıynsha álem chempıony qazaqstandyq Gennadıı Golovkın avstralııalyq boksshy Denıel Gıldi 3-raýndta sulatyp saldy . 33 jastaǵy Denıel Gılge qarsy kezdesý 27 shildede Nıý-Iorktegi 20 myń oryndyq Madison Square Garden arenasynda ótti. Jekpe-jek HBO telearnasy arqyly 100-den astam elde kórsetildi. Bul Gennadııdiń kásipqoı bokstaǵy 30-shy kezdesýi. Al WBA chempıony tıtýlyn 11-shi ret qorǵady.
