Elbasynyń Japonııaǵa sapary úlken sımvoldyq mánge ıe boldy - sarapshy

ALMATY. QazAqparat- Elbasy Nursultan Nazarbaevtyń Japonııaǵa jasaǵan sapary úlken sımvoldyq mánge ıe boldy. Sondaı-aq, onyń praktıkalyq mańyzy zor. Bul týraly QR Tuńǵysh Prezıdenti – Elbasy Qory janyndaǵy álemdik ekonomıka jáne saıasat ınstıtýtynyń (ÁESI) sarapshysy Anton Býgaenko aıtty dep habarlaıdy,QazAqparat tilshisi.

23-24 qazanda Elbasy Nursultan Nazarbaev resmı saparmen Japonııaǵa bardy. Elbasy Imperatordyń taqqa otyrý saltanatynda Ortalyq Azııa óńiriniń joǵary deńgeıdegi jalǵyz ókili boldy, bul Japonııanyń aımaqtyq saıasatyndaǵy Qazaqstannyń mańyzdylyǵyn rastaıdy.

«Nursultan Nazarbaevtyń sapary barysynda Japonııanyń Premer-Mınıstri Sındzo Abemen kezdesý ótti. Premer-Mınıstrmen áńgimelesý barysynda Nursultan Nazarbaev Japonııa ınvestıtsııasynyń Qazaqstandaǵy rólin atap ótti. 2019 jyldyń basynda japondyq kompanııalardyń ınvestıtsııa kólemi 5,9 mlrd AQSh dollaryn qurady, al japondardyń qatysýymen kásiporyndardyń sany 70-ke jetti. 2019-2021 jyldary Qazaqstan shamamen 1 mlrd AQSh dollary kóleminde ınvestıtsııa tartýdy josparlap otyr. Kontınenttegi Japonııanyń ınvestıtsııalyq qyzmetiniń jandanýy japon kompanııalarynyń jańa ınvestıtsııalaryn tartýǵa múmkindik beredi»,-dedi sarapshy Anton Býgaenko.

Sarapshynyń aıtýynsha, Japondyq kompanııalardyń Qazaqstan ekonomıkasyna salǵan ınvestıtsııalary eki el arasyndaǵy saýdanyń ósýine yqpal etti.

«Máselen, 2018 jyly saýda kólemi 2 mlrd AQSh dollaryna jetip, 54%-ǵa artty. Osyǵan baılanysty Sındzo Abe eki jaqty saýda qatynastaryn damytý úshin mádenı baılanystardyń mańyzdylyǵyn atap ótti. Onyń pikirinshe, «adamı baılanystardyń keńeıýi ekonomıkalyq jáne iskerlik qatynastardyń odan ári damýyna serpin beredi», sonymen birge ol Qazaqstandaǵy iskerlik ahýaldy odan ári jaqsartý qajettigin atap ótti»,-dep qosty Anton Býgaenko.

Aıta keteıik, osy sapar barysynda QR Tuńǵysh Prezıdenti Elbasy Nursultan Nazarbaevqa Tsýkýb ýnıversıtetiniń qurmetti doktory ataǵy berildi.