Elbasynyń jańa baılamyna úlken senimmen qaraımyn-Lázzat Qarjaýbaeva

QYZYLORDA. QazAqparat - «QR Prezıdentiniń bılik tarmaqtary arasynda ókilettilikterdi qaıta bólý máseleleri jónindegi 2017 jylǵy úndeýi qoǵamda úlken qoldaýǵa ıe boldy. 

Táýelsizdik alǵan jyldary zaman aǵymyna, ýaqyt talabyna saı memlekettiń Prezıdenttik basqarý formasyn tańdaýy el tutastyǵyn saqtaý jolyndaǵy utymdy sheshim boldy»,-deıdi Qorqyt Ata  atyndaǵy QQMÝ quqyqtaný kafedrasynyń meńgerýshisi, zań ǵylymdarynyń kandıdaty Lázzat Qarjaýbaeva.

«Búginge deıingi álem elderiniń qazaq halqyn ult retinde tanyp, memleket retinde moıyndaýy - sol kezdegi ýaqtyly qabyldanǵan sheshimniń qundylyǵy.

Qazirgi tańda elimiz álem boıynsha damyǵan aldyńǵy qatarly 30 eldiń qataryna enýdi kózdep otyr. Elimiz talaı syndarly sátterde saǵy synbaı, kóptegen kedergilerdi artqa tastady. Qıyndyqtardy eńsere bildi. Halyqaralyq tájirıbelerge súıene otyryp, birshama jańa ózgerister men tolyqtyrýlar bizdiń alǵa jyljýymyzdyń negizgi qazyǵyna aınalǵan kezder de boldy. Memleket basshysy Qazaqstan halqyna arnaǵan Úndeýinde endi memleketti basqarý barysynda kóp kúsh Úkimet pen Parlamentke túsip, olardyń róli aıtarlyqtaı basym bolatyndyǵyna toqtaldy. Shamamen 40 shaqty ókilettilik Úkimetke nemese Parlamentke júkteletindigin de qaperge ildi.

Osy reformanyń tereń máni el bıliginiń Prezıdenttik jáne Parlamenttik basqarý júıesine birtindep kóshetindigin ańǵartady. Sondyqtan búginge deıin halqynyń qamyn oılap, batyl sheshimder qabyldaǵan Elbasynyń jańa baılamyna úlken senimmen qaraımyn»,-dep qorytty sózin L. Qarjaýbaeva.