Elbasynyń jańa áleýmettik bastamalary tıimdi nátıjege qol jetkizedi - sarapshy
«Elimiz áleýmettik memleket bolýǵa, naqty áleýmettik kepildikterge bet buryp keledi. Muny bıýdjettiń 45% áleýmettik salaǵa jumsaý sheshimi aıǵaqtaıdy. Buǵan deıin de azamattardyń jekelegen sanattaryn qoldaý úshin aýqymdy qarajat bólinetin. Biraq, bul qarajat dittegen jerine jetpeıtin. Ekinshiden, óńirlerdiń ınfraqurylymdyq damýy birdeı bolmady. Óıtkeni, barlyq ákim basymdyqty durys qoıa bilmedi. Qazir aýyl jáne aýdan ortalyqtarynda, kishigirim qalalarda jáne oblys ortalyqtarynda ne bolatynyn naqty bilý úshin eldi mekenderdiń ár sanatyna biryńǵaı óńirlik standart qurý tapsyryldy. Tıisinshe, munyń bárine endi qatań baqylaý qajet. Jáne Prezıdent ákimshiligi basshylyǵynyń osy sharalardy júzege asyrýdy baqylaýdyń naqty jáne tıimdi tetikterin jasap jatqany qýantady», - dedi sarapshy «QazAqparat» tilshisine.
Sarapshynyń aıtýynsha, qazirgi ýaqytta «Nur Otan» partııasynyń róli artyp, monıtorıng ortalyǵy qurylyp jatyr. Sáıkesinshe, halyqpen qarym-qatynas ta jolǵa qoıylyp keledi, buǵan halyqtyń ákimderimen turaqty kezdesýi men qoǵamdyq pikirdi ólsheý quraldary yqpal etti.
Sonymen birge, saıasattanýshy úkimetke senim máselesiniń mańyzdy ekenin atap ótti.
«Ótken jyldary kóptegen tapsyrmalar berilse de, olar jetkilikti túrde júzege asyrylmady. Al Memleket basshysynyń jańa áleýmettik bastamalary úlken nátıje kórsetedi, sebebi bul bastamalar jarııalanǵan sátte olardyń oryndalýyn baqylaý men qadaǵalaý tetikteri jasaldy. Búgin Prezıdent Ákimshiliginde ótken keńes te jańa áleýmettik bastamalardy júzege asyrýǵa qozǵaý salady, Prezıdent tapsyrmalaryn ári qaraı júzege asyrýǵa paıdaly jáne tıimdi bolady», - dedi Talǵat Qalıev.
Eske sala ketsek, búgin Aqordada Prezıdent Ákimshiliginiń basshysy Áset Isekeshevtiń tóraǵalyǵymen Elbasy tapsyrmalarynyń tıimdi ári sapaly atqarylýyn qamtamasyz etý, memlekettik baǵdarlamalar men reformalardy júzege asyrý máseleleri jóninde keńes ótti.
