Elbasynyń zeınetaqyny jańǵyrtý boıynsha júktegen tapsyrmalary jurtshylyqtyń kóńilinen shyǵady - G. Isimbaeva
ASTANA. 11 maýsym. QazAqparat - Elbasynyń zeınetaqyny jańǵyrtýǵa qatysty júktegen tapsyrmalary da jurtshylyqtyń kóńilinen shyǵady. Memleket basshysy N. Nazarbaevtyń zeınetaqyny jańǵyrtýǵa qatysty jasaǵan úndeýine oraı QR Parlamenti Májilisiniń depýtaty Gúlmıra Isimbaeva osyndaı pikir bildirdi.
«Elbasynyń zeınetaqy júıesin jańǵyrtýdy 2018 jyldan engizý jónindegi sheshimi asa salıqaly, jan-jaqty qamtylǵan dúnıe boldy. Buny búkil qazaqstandyqtar, onyń ishinde áıelder qaýymy kútkeni de ras. Prezıdenttiń tapsyrmasy boıynsha zeınetaqy júıesin jańǵyrtýdy 5 jylǵa shegerý osy jumystarǵa ázirlik úshin tolyq múmkindikti qamtıdy dep oılaımyn», - dedi depýtat G. Isimbaeva.
Onyń aıtýynsha, Elbasynyń zeınetaqyny jańǵyrtýǵa qatysty júktegen tapsyrmalary da jurtshylyqtyń kóńilinen shyǵady. Máselen, bala kútimine qatysty zeınetaqy salymdarynyń memleket tarapynan sýbsıdııalanýy da, zeınetaqy tólemderin 5 paıyzǵa arttyrý sharalary da mańyzdy. Tólemderdi arttyrý túptep kelgende jınaqtaýshy qordaǵy qarajattyń kóbeıýine yqpal etedi. «Eń bastysy 5 jyldyq merzimde jumyspen qamtý, óńirlerdi damytý baǵdarlamalarynyń barlyǵy úılestirilip, halyqty, áıelder qaýymyn jumyspen qamtýdy jan-jaqty damytýǵa tıispiz. Álbette, basty másele - jumys. Jumys bolsa jalaqy da bolady, jalaqydan zeınet salymy alynady. Al zeınet jınaǵy neǵurlym kóbeıgen saıyn, zeınetaqy mólsheri de soǵurlym artatyny aqıqat», - dedi G. Isimbaeva.
