Elbasynyń zeınetaqymen qamsyzdandyrý týraly zańdy Parlamentke qaıtarýy utymdy sheshim boldy - N. Sábılıanov
ASTANA. 12 maýsym. QazAqparat - Elbasynyń «Qazaqstan Respýblıkasynda zeınetaqymen qamsyzdandyrý týraly zańdy» qaıta talqylaý úshin Parlamentke qaıtarýy utymdy sheshim boldy.
Bul týraly búgin Májilistiń jalpy otyrysynda depýtat Nurtaı Sábılıanov aıtty.
Qazaqstandyq qoǵamdy damytýdyń eń kúrdeli kezeńderinde Memleket basshysy Nursultan Nazarbaevtyń eliniń taǵdyry úshin jaýaptylyqty árqashan ózine alǵanyna jáne alyp júrgenine ári birden-bir durys sheshim qabyldaıtynyna búkil el san márte kýá bolǵandyǵyn atap ótken halyq qalaýlysy: «Ótken juma kúni Memleket basshysy Qazaqstan halqyna joldaǵan Úndeýinde zeınetaqymen qamsyzdandyrý júıesin damytý máselesin sheshýge jan-jaqty toqtala otyryp, áıelderdiń zeınet jasyn ósirý týraly normalardy engizý merzimin ózgertýge baılanysty dáıekti dálelder keltirgende oǵan taǵy da kóz jetkizdik. Bul rette Prezıdent Parlament depýtattarynyń zeınetaqy zańnamasyn odan ári jetildirý qajettigi týraly ustanymyn tolyq qoldaıtyndyǵyn atap ótti. Sonymen birge óz Úndeýinde Úkimet pen Ulttyq banktiń halyqqa jańa zeınetaqy zańnamasyn túsindirý jónindegi jumysty durys atqarmaǵandyǵyn qadap aıtty»,-dedi.
Depýtattyń atap ótýinshe, Úkimet árbir qazaqstandyq otbasyna qatysy bar osy zań jobasynyń mán-maǵynasyn halyqqa jetkizip jáne zeınetaqy zańnamasyna ózgerister engizý arqyly barsha qazaqstandyq zeınetkerlerdiń jaqsy turmysyna berik kepil bolatynyn túsindirýi tıis edi.
«Árbir qazaqstandyqtyń taǵdyry úshin, bolashaǵy úshin alańdaıtyn Memleket basshysy osy jaǵdaıda atalǵan zań jobasyn qaıta talqylap, daýysqa salý úshin Parlamentke qaıtarýyna týra keldi. Bul óte durys, utymdy sheshim dep oılaımyn»,-dedi N. Sábılıanov.
