Elbasynyń týyndysy kóptiń qolynan túspeıtin kitap bolar degen senimdemin - Myrzataı Joldasbekov

ASTANA. QazAqparat - Memleket qaıratkeri, professor Myrzataı Joldasbekov Elbasynyń jańadan tusaýy kesilgen «Táýelsizdik dáýiri» kitaby týraly pikirin bildirdi, dep habarlaıdy «QazAqparat» HAA tilshisi.

«Bul týyndyda Qazaqstannyń júrip ótken joly anyq kórsetilgen. Biz endi osynaý oqıǵalardyń bel ortasynda bolǵan adamdarmyz. Bári de taıǵa tańba basqandaı kókiregimizde saırap tur. Keńes odaǵy degen ımperııa qulap, tas-talqan bolyp jatqan kezde respýblıkalardyń árqaısysy jeke shańyraq kóterip, el bolyp jatty. Biz de qudaıǵa táýbe dep, 1991 jyly búkil halyq bolyp, Elbasymyzdy saıladyq. Sol kezde saılaýdyń shtabyn basqarǵanym esimde. 98,8 paıyzdyq daýyspen Nursultan Nazarbaev Prezıdent bolyp saılanǵan edi. 16 jeltoqsanda Qazaqstannyń Táýelsizdigi jarııalandy. Sodan beri qaraı Elbasy memleketimizdiń qolyna tizginin alyp, qırandydan, byt-shyt bolyp, tamtyǵy qalmaǵan, respýblıka degen aty bar, zaty joq memleketten Táýelsiz Qazaqstandy ornatty», - deıdi professor.

Myrzataı Joldasbekovtyń aıtýynsha, el Prezıdenti qazaqstandyq jolyn aıqyndap, damý kezeńi bastalǵannan keıin Qazaqstandy álem tanyp, moıyndaǵan.

«Men kóptegen oqıǵalardyń ishinde bolǵan adammyn. Elbasymen birge otyryp, sol kisiniń qasynda júrip, Qazaqstanda tuńǵysh quryltaı ótkizdik. 1991 jyly jeltoqsannyń 10-y kúni Tuńǵysh Prezıdentti taqqa otyrǵyzý rásimin ótkizdik. Sol rásimdi basqarý meniń pesheneme jazylǵan edi», - dep ótkendi eske aldy Myrzataı Joldasbekov.

Professor óz sózinde sol sátterdiń barlyǵy kitapta jazylǵanyn aıtady.

«Kitap úlken tórt bólimnen turady. Sol tórt bólimde Elbasy bastan aıaǵyna deıin marjandaı qylyp, úsh rýhanı jańǵyrýymyzdy kórsete bildi. Biz Táýelsizdik alǵannan beri jańǵyryp kele jatqan elmiz. Sondyqtan, bul kitap jas balalardan bastap, eńkeıgen kárilerge deıin qolynan túspeıtin kitaby bolar degen senimdemin», - deıdi professor.

Eske sala ketsek, 15 jeltoqsanda Astanada Memleket basshysy Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeseri bolyp ótti. Tarıhı pýblıtsıstıka janrynda jazylǵan, qazaq jáne orys tilderinde basylǵan Elbasynyń bul eńbegi elimizdiń jańa tarıhy men onyń erteńine degen avtordyń kózqarasyn tanytady.